تاند نیوز ډیسک: کابل کې د ملګرو ملتونو استازی تدامیچي یاماماتو وايي، افغان ټاکنې او سوله دوه مهم لومړیتوبونه دي او نه باید یو بل تر سیوري لاندې راولي.
د یوناما له لوري په دې تړاو رسنیو ته نن یکشنبه غرمه استول شوې خبرپاڼه کې د یاماماتو له قوله راغلي، سوله او ټاکنې سره جلا دي او یوه پروسه باید د بلې پروسې د ځنډ لامل نه شي، بلکې دواړه کارونه په خپل وخت باید مخته یوړل شي.
نوموړي وایي، ټاکنې او سوله به د افغانستان لپاره برخلیک ټاکنونکي وي او ملګري ملتونه به د دواړو پروسو ملاتړ جاري ساتي.
ماتو دغه راز ټینګار کړی چې افغانستان له ټاکنو وروسته د پرلپسې کړکیچ توان نور نه لري.
نوموړي که څه هم سولې ته محتاطانه هیله مندي ښودلې خو زیاته کړې یې ده د سولې ټولې هڅې سمې خواته روانې دي
دا په داسې حال کې ده چې پرون د ولسمشرۍ یو شمیر نوماندانو یاماماتو سره لیدنه کې سوله د اولیت په ډول مطرح کړې وه او ترې غوښتي یې وو چې ټاکنې دې طالبانو سره له سولې وروسته وشي.
