تاند- تُرکي رسنۍ وايي چې هیواد یې له افغانستان سره د څلورنیم ملیون ډالرو په ارزښت پوځي مرسته کړې ده.
د ترکیې سبا ورځپاڼې نن /جمعه/ راپور ورکړ چې ترکیې دا پوځي مرسته افغانستان ته د هغې موافقې پر اساس ورکړې چې د ۲۰۱۸ م کال په سپټمبر میاشت کې د دوو هیوادونو ترمنځ لاسلیک شوې وه.
ټاکل شوې ده چې د ترکیې له پوځي مرستو څخه د افغانستان د ملي اردو په لوژیستیکي او اکمالاتو برخو کې وکارول شي.
که څه هم اکثره هیوادونه له افغانستان سره پوځي او نورې مرستې تر ډېره د دې لپاره کوي چې په دې توګه د امریکا ملاتړ او رضایت خپل کړي خو ترکیه د خپل تاسیس له وخته له افغانستان سره نژدې سیاسي او مذهبي اړیکې لري.
د ترکیې او امریکا اړیکې له روسیې څخه د ایس ۴۰۰ توغندويي سیستم د پېرودلو په خاطر ترینګلي شوي دي.
ترکیې نن /جمعه/ اعلان وکړ چې د دې سیستم د وسایلو لومړۍ جوپه وروسپارل شوه.
د ترکیې له پوځي مرستې جلا کاناډا ویلي چې د افغان نجونو او مېرمنو د روزنې لپاره افغانستان ته د ۱۴ ملیون ډالرو مرسته ورکوي.
کاناډا ویلي چې دا مرسته د هغو افغان نجونو او مېرمنو لپاره ده چې د افغانستان په کلیوالي سیمو کې اوسي.