تاند، جهارشنبه، د چنګاښ ۲۶مه: ولسمشر غني د سعودي عربستان له شهزاده او ولیعهد محمد بن سلمان سره د افغانستان پر سوله غږېدلی دی.
له ارګه په دې اړه خپره شوې خبرپاڼه کې راغلي، ولسمشر بیګا ماښام له محمد بن سلمان سره ټلیفوني تماس نیولی ورسره یې د سولې پروسه کې د سعودي پر رول، امنیتي مسایلو، ټروریزم ضد جګړه او د سعودي عربستان بازارونو ته د افغاني تولیداتو برخه کې د خنډونو لرې کولو په اړه خبرې کړې دي.
ولسمشر دغه راز له شهزاده بن سلمان سره په سیمه ییز اقتصادي اتصال کې د سعودي عربستان په رول هم ټینګار کړی .
سعودي عربستان له هغو هیوادونو څخه یو دی چې د افغانانو په مشرۍ او مالکیت یې د سولې له پروسې ملاتړ کړی دی خو ورسره څنګ کې داسې هم ویل کېږي چې سعودي د پاکستان په څېر له ترهګرو ډلو څخه قوي ملاتړ کوي، خو دواړو هېوادونو بیا تل دا تورونه رد کړي دي.