د کندهار برید، ۴ ځانمرګي، ۲ پولیس او ۹ ملکیان مړه، ۸۳ ټپیان

تاند، پنجشنبه د چنګاښ ۲۷ مه: د کندهار پر امنیه قوماندانۍ له موټر بم وروسته د ۴ ځانمرګو ډله ییز برید پای ته ورسېد.

د لومړنیو معلوماتو په اساس چاودنه کې تر ۸ ملکیان او دوه پولیس شهیدان، خو درې کسه پولیس او ۸۰ ملکیان زخمیان دي.

د کندهار یوه مهمه امنیتي سرچینه تاند ته وایي، بریدګر اته کسه وو چې دوه تنو یې د قومندانۍ شمالي دروازه کې چې د مخدره موادو پر ضد د مبارزې مدیریت ته نږدې وه، ځان الوځولی او شپږ تنه یې ودانۍ ته دننه شوي.

خو د کندهار د والي ویاند وايي چې د انتحاري بریدکوونکو شمېر ۴ تنه وو چې ټول ووژل شول.

دا په داسې حال کې ده چې څو ورځې وړاندې طالبانو همدغسې برید کې د بادغیس ولایت امنیه قومندانۍ تر مخه پولیسو سره جګړه کړې وه.

په دې وروستیو کې چې د سولې خبرو هم زور اخیستی دی طالبانو ملکي ځایونو کې ترهګریزو بریدونو ته زور ورکړی دی.

د وروستیو راپورونو په اساس د طالبانو وروستیو بریدونو کې ۲۰۰ نه زیات ملکیان وژل شوي او له ۳۰۰ زیات ټپیان دي.