تاند، جمعه د چنګاښ ۲۸مه: د فراه امنیتي چارواکی وايي، طالبان دغه ولایت کې له جوماتونو څخه د افغان ځواکونو پر ضد جګړه کې سپر په توګه استفاده کوي.
چارواکي وايي، تر ټولو تازه پېښه کې طالبانو بیګا شپه یوولس بجې د ولایت مرکز ته نږدې د غلام صدیق خان کلا پر پوستې برید کړی او بیا پر جومات ننوتي دي.
د فراه د امنیه قومندانۍ ویاند محب الله محب وايي، افغان ځواکونو طالبان پسې اخیستي او هغوی ترې جومات ته ننوتي او له هغه ځایه یې جګړه پیل کړې ده: (( جګړه څو ساعته روانه وه چې په ترڅ کې يې دوه طالبان وژل شوي او درې نور ټپیان دي. دغه راز طالبانو د جومات محراب هم شهید کړی دی.))
محب زیات کړه، په جګړه کې د طالبانو یو سنایپر نښان ویشتونکی هم وژل شوی او د فراه درې پولیس هم په کې ټپیان شوي دي.
په همدې حال کې د فراه ولایتي شورا له مقدسو ځایونو څخه د طالبانو د سپر په توګه استفاده غندلې ده.
د فراه د ولایتي شورا مرستیال شاه محمود نعیمي وايي، دا لومړی ځل نه دی چې فراه کې طالبان له جومات نه د سپر په توګه استفاده کوي، بلکې د نعیمي په خبره وروستیو کلونو کې طالبان د خلکو له کورونو، ښوونځیو، جوماتونو څخه په اعظمي ډول د سپر په توګه کار اخلي: (( طالبان په لسګونه ځله د دغسې کارونو په ترسره کولو د خلکو د مال او زیان سبب ګرځېدلي دي.))
دا په داسې حال کې ده چې د هېواد د زیاتره سیمو اوسېدونکي وايي، طالبان د کلیو جوماتونو ته خلک د لمانځه لپاره نه پرېږدي او هر ځای کې یې چې زور ډېر وي د همغه ځای جوماتونه یې خپلې قرارګاوې او ټریننګ مرکزونه ګرځولي دي.
طالبان اکثره جوماتونو کې ماینونه هم جوړوي چې څو څو ځله پرې جوماتونو کې خپل ماینونه هم چاودلي دي.