صدیقي: حتی آی ایس آی هم طالبان بیا واک ته نه شي رسولی

تاند، دوشنبه، د چنګاښ ۳۱مه: ولسمشرۍ ماڼۍ وايي، طالبان آن د آی ایس آی په ملاتړ هم نه شي کولی چې بیا واک ته ورسېږي.

د ولسمشر ویاند صدیق صدیقي نن ماسپښین یو رسنیز کنفرانس ته وویل، افغان حکومت د سولې واضح تګلاره لري او د دغې تګلارې یو مهم اصل یې هم دا دی چې د افغانانو ګټې به په سوله کې خوندي ساتي.

ښاغلی صدیقي زیاتوي، کابل دا مهال له متحدینو سره په ګډه د سولې په بهیر کار کړی او لا هم دې برخه کې د تفاهم خبرې روانې دي: ((طالبانو سره د خبرو او مذاکراتو پیل جدي مرحله کې کابل ژمن دی چې د سولې پروسه په ډېر تدبیر مخته یوسي.))

صدیقي دغه راز وايي، ملګري ملتونه چې د افغانستان د ۱۸ کلنو لاسته راوړنو کومه خبره او غوښتنه کوي، افغان حکومت هم په دغو غوښتنو ټینګ ولاړ دی: (( حکومت همدا راز ژمن دی چې د سولې پروسې ته به ټول لوري راګډ کړي او داسې مذاکراتي پلاوی به تشکیل کړي چې ټولو ته به د منلو وړ وي.))

نوموړي دغه راز ویلي چې طالبانو له پاکستاني استخباراتو سره له ډېره وخته سیستماتیکې اړیکې پاللې دي، خو اوس هیڅ امکان نه لري چې دا ډله د حکومت په توګه بیا افغانستان کې راڅرګنده شي: (( حتی که طالبان اوس د آی ایس آی پوره ملاتړ هم ولري بیا واک ته نه شي رسېدای.))

 صدیقي په سپینو ټکو ویلي، د سولې پروسه طالبانو لپاره یو چانس دی ګني دا ډله دومره زور نه لري چې پر افغانستان ولکه ټینګه کړي.

دا په داسې حال کې ده چې د قطر له مذاکراتو باخبره سرچینو په وار وار خبر ورکړی چې طالبان غواړي امریکا سره د یوې پټې معاملې له مخې د افغانستان واک ترلاسه کړي او بیا یو مستبد امارتي حکومت په افغانستان کې راولي، چې دا خبرې یې په ځلونو له سختو ولسي غبرګونونو سره مخ شوې دي.