د ترکیې د کورنیو چارو وزیر وايي چې د دغه هیواد پولیسو په تېرو دوو اوونیو کې په استانبول کې د سوریې او یو شمېر نورو هیوادونو ۶ زره ناراجستر پناه غوښتونکي نیولي دي.
په وروستیو کې په دې اندښنه ښکاره شوې چې په سلګونو سوریه وال مهاجر وروسته له دې بېرته خپل هیواد ته استول شوي چې هغوی د فورمو لاسلیکولو ته اړ ایستل شول.
د فرانس پریس خبري اژانس د راپور له مخې، دا هم ویل شوي چې سوریه والو د فورمو، چې په ترکي ژبه ول، په معنا نه پوهېدل خو په زوره پرې لاسلیک شوي دي.
خو د ترکیې د کورنیو چارو وزیر سلیمان سویلو دا ادعا رد کړه.
ده این ټي وي تلویزیون ته وویل چې د جولای له دوولسمې راهیسې عملیات روان دي چې په لړ کې یې ۶ زره ۱۲۲ تنه په استانبول کې نیول شوي او د هغو په منځ کې ۲۶۰۰ افغانان دي.
د ترکیې د کورنیو چارو وزیر وویل چې سوریه وال هم په نیول شویو کسانو کې شامل دي خو د هغو شمېر څرګند نه دی.
ده دا هم وویل، نیول شوي سوریه وال د کډوالو کمپونو ته لېږي.
د ده اشاره هغو کمپونو ته وه چې د سوریې پولې ته نژدې د ترکیې په هاتای ولایت کې جوړ کړي دي.
د ترکیې د کورنیو چارو وزیر په عین حال کې وویل چې ځینې سوري کډوال د کډوالو کمپونو ته د تګ پر ځای غوره بولي چې په خپله خوښه خپل هیواد ته لاړ شي.
په ترکیه کې ۳ ملیونه او ۵ لکه سوري کډوال اوسي.
د سوریه والو د غیرحکومتي موسسو یوې ټولنې ویلي چې تر ۶۰۰ زیات داسې سوري کډوال په نورو ولایتونو کې هم نیول شوي چې اسناد یې لرل.
ډېر افغانان ترکیې ته د دې لپاره ځي چې له دغه هیواده اروپايي هیوادونو ته لاړ شي.
په وروستیو کلونو کې، وروسته له دې چې د کډوالو د مخنیوي پر سر د ترکیې او اروپايي اتحادیې ترمنځ همکارۍ زیاتې شوي دي، ترکیې له ایران سره خپلې پولې ټینګې کړي چې افغان کډوال په اسانه ترکیې ته وانوړي.
د سږ کال په لومړیو کې د ترکیې پولیسو په سلګونو افغان کډوال په ازمیر او څو نورو ولایتونو کې ونیول.