نائب امین الله خان لوګري روغتون چارې چې څه باندې لس کاله وړاندې پیل شوې وې، د زمري په ۲ مه د افغاني او پاکستاني چارواکو له خوا د پټۍ په پرېکولو سره رسماً ګټې اخیستنې ته چمتو شو.
د نائب امین الله خان روغتون د پرانیستې په مراسمو کې د عامې روغتیا وزیر فیروزالدین فیروز، د ښارجوړونې او ځمکو وزیر جواد پیکار، په پارلماني چاروکې د پاکستان د دولت وزیر شهریار افریدي، په افغانستان کې د پاکستان سفیر ذاهد نصرالله سربېره د دواړو هیوادونو یوشمېر نورو چارواکو هم ګډون کړی وو.
د عامې روغتیا وزیر وویل، چې یاد روغتون د پاکستان هیواد په مالي مرسته جوړ شوی او څه باندې ۱۸ میلیونه ډالره لګښت پرې راغلی چې په وینایې دغه روغتون اوسمهال د سلو بستر خونو په لرلو د ناروغانو درملنې ته چمتو شوی دی.
فیروزالدین فیروز له ګاونډ هیواد پاکستان څخه د مننې ترڅنګ زیاته کړه چې د یاد روغتون د بنسټ ډبره څه باندې لس کاله وړاندې اېښودل شوې وه او د یوشمېر سیاسي ملحوظاتو له مخې کار چارې یې په ټپه درېدلې وي، چې د ملي وحدت حکومت په راتګ سره بېرته پیل او نن ګټې اخیستنې ته چمتو شوه.
نوموړي هیله څرګنده کړه چې یاد روغتون به د سویل ختیځ زون په کچه یو ستر روغتون وي، چې پر لوګر سربېره د پکتیا، پکتیکا او خوست ولایتونو د ناروغانو درملنه کوي.
د عامې روغتیا وزیر وویل، هڅه یې داده چې په راتلونکې کال کې به د دغه روغتون د بستر خونې ۳۰۰ ته لوړې کړي چې ورسره سم به د روغتیایي خدماتوپه وړاندې کولو کې هم پراختیا راشي.
د پاکستان په پارلماني چاروکې د دولت وزیر شهریار افریدي په خپلو خبروکې افغانستان خپل دوست هیواد یاد کړ او د دواړو هیوادو نو د اړیکو پر غښتلتیا یې ټینګار وکړ.
افریدي وویل،په افغانستان کې د جګړو او نا امنیو له کبله پاکستان هم سخت زیانمن شوی او د دواړو هیوادونو مشرانو هڅې پیل کړي؛ ترڅو یادې ستونزې ژر تر ژره حل کړي.
د یاد روغتون رئیس ډاکټر جواد جهید وویل، چې دغه روغتون په دریو پوړونو کې د شل جریبه ځمکې په مساحت د مرکز اړوند په کُنجک سیمه کې جوړ شوی او پنځه بلاکونه لري.
جهید وویل، یاد روغتون اوسمهال د عمومي داخلې، جراحي، اورتوپیدي او زیږنتون سربېره په یو شمېر نورو روغتیایي برخو کې خدمات وړاندې کوي.
که څه هم د لوګر ځایي اوسیدونکي د یاد روغتون پرانیستو ته خوښ دي خو له مسوؤلو چارواکو غواړي چې د دغه روغتون خدماتو ته ځانګړی پام واړوي او بستر خونې دې له ژمنې سره سم ۳۰۰ ته ورسوي.
شفیع الله افغانزی – لوګر.
په کنجک کې د مرحوم ظاهرشاه له وخته یو ښکلی روغتون موجود وو چې د جهادي خرمستیو او بې باوریو له امله لومړی اور کې وسوځېد او بیا یې خښتې هم چور ، آهن چادر یې کباړ او کباړستان ته وروړ.
هیله ده داځل لوګریان د خپل روغتون او ډاکتر په قدر پوه شوي وي او بیا هغه پخوانۍ تېروتنې تکرار نه کړي. روغتون د ټول ولس مال دی او هر څوک باید دهغه د ساتلو لپاره خپله مرسته ونه سپموي.
روغتیا پالانو ته هم لازمه ده چې د خپل ولس دردونه دوا کړي او له ناروغانو سره په پوره شفقت او زړه سواندۍ سره چلند وکړي.