تاند، جمعه، د اسد ۴ مه: د کندهار امنیه قومندان تادین خان ادعا کړې چې پاکستان په سوداګریزو کاماز موټرو کې د طالبانو مړي له کندهاره پټ وباسي.
تادین خان پر خپله ټویټر پاڼه لیکلي، طالبانو بیګاه شپه په ښورابک او ریګستان ولسوالیو بریدونه کړي خو بېرته د امنیتي او هوايي ځواکونو له خوا تر سخت مقاومت وروسته په شا تمبول شوي دي.
نوموړی وايي، دې نښته کې ۶۱ طالبان وژل شوي او ۳۰ نور ټپيان دي.
د تادین خان په خبره د کندهار د استخباراتي مسوولانو د معلوماتو له مخې له پاکستان څخه کاماز موټر را اوښتي او د طالبانو مړي یې په کې بېرته له ډیورنډ کرښې اړولي دي.
دا په داسې حال کې ده چې تر دې وړاندې ملي امنیت هم تور پورې کړی و چې د کندهارپر امنیه قومندانۍ د طالبانو د تېرې اوونۍ برید پاکستان کې پلان شوی و.
هغه برید کې ۱۱ کسان مړه او له ۲۰۰ زیات چې لوی شمېر یې ملکیان وو، په دې برید کې ټپيان شول.