تاند، دوشنبه، د اسد ۲۱مه: په قطر کې د طالب استازو او امریکايي لوري اتم پړاو مذاکرات نن دوشنبه پای ته ورسېدل
د طالبانو ویاند ذبیح الله مجاهد پر خپله ټویټر پاڼه لیکلي، مذاکرات بیګا شپه دوه بجې ختم شول او دواړو لوریو هوکړه کړې ده چې د راتلونکو اقداماتو لپاره به خپلو مشرانو سره مشورې کوي.
مجاهد زیاته کړې، چې مذاکرات د عرفې او اختر په اوله ورځ هم روان وو او مذاکراتي ټیمونو د شپې تر دولسو بجو پر هوکړه کار کړی دی.
بلخوا زلمي خلیلزاد د خپل اختریز پیغام کې ویلي، چې د جګړې دواړه لوری دې د سولې د تحقق لپاره قربانیو ته چمتو شي.
نوموړي ویلي، هیله من یم چې دا به وروستی اختر وي چې افغانان یې په جګړه کې تېروي او د مذاکراتو بریالي کېدو ته یې هم هیله مندي ښودل ده.
نوموړي زیاته کړې، د امریکا دولت له افغانانو سره د هغې سولې د ملاتړ لپاره ولاړ دی چې راتلونکي کې هیڅوک ترې ګواښ احساس نه کړي، خو ښکېل لوري دې هم د واقعي سولې لپاره هر ډول قربانۍ ته تیار شي.
دا په داسې حال کې ده چې طالبانو او امریکايي لوري د اتم پړاو خبرو له پیل وړاندې ویلي وو چې دا وار به د سولې هوکړه نهايي کېږي او د اختر په څلورمه یا څو ورځې وروسته هوکړه د نړیوالو او سیمه ییزو شاهدانو په حضور کې لاسلیک کېږي، خو اوس ولیدل شي چې اخري نتیجه څه راوځي؟