تاند- په افغانستان کې د غوڅ ملاتړ ماموریت وايي چې په دې هیواد کې نن /چهارشنبه/ دوه امریکايي پوځیان وژل شوي دي.
غوڅ ملاتړ ماموریت په یوه خبرپاڼه کې د دې خبر د اعلانولو ترڅنګ ویلي چې د وژل شویو پوځیانو هویت تر هغو نه څرګندوي چې د قربانیانو کورنیو ته خبر نه وي ورکړل شوی.
د دغو دوو امریکايي پوځیانو له وژل کېدو سره په روان ۲۰۱۹ م کال کې په افغانستان کې د وژل شویو امریکايي پوځیانو شمېر ۱۶ تنو ته ورسېد. د دوی په منځ کې اکثره د افغانستان د دولت له وسله والو مخالفانو سره په نښتو کې وژل شوي خو دوه تنه د جولای په ۲۹ نېټه په نفوذي برید کې ووژل شول.
ناټو یا د غوڅ ملاتړ ماموریت د پېښې د ځای په اړه څه نه دي ویلي خو نیوزویک وايي چې د پنتاګون سرچینو ورته ویلي چئ دا دوه امریکايي پوځیان د امریکا خاص ځواکونه وو او دواړه د ننګرهار په اچین ولسوالي کې په مرمیو لګېدلي او وژل شوي دي.
دا دوه امریکايي پوځیان په داسې حال کې ووژل شول چې پرون د امریکا ولسمشر ډانلډ ټرمپ په افغانستان کې د امریکايي ځواکونو رول د پولیسو مسخره ځواک ته ورته وباله او له افغانستانه یې د امریکايي پوځیانو د وتلو پر اړتیا ټینګار وکاوه.
ولسمشر ټرمپ له طالبانو سره د سولې روانو خبرو ته په اشارې وویل چې طالبان له امریکا سره د جګړې د پای ته رسولو غوښتونکي دي، خو زیاته یې کړه چې تر اوسه دا روښانه نه ده چې کېدای شي پر طالبانو باور وشي.