تاند-(چهارشنبه د سنبلې ۶) په داسې حال کې چې په قطر کې د طالبانو او امریکایانو د سولې خبرې وروستي پړاو ته رسېدلي، د روسیې د بهرنیو چارو وزیر وايي، مسکو تیار دی چې د امریکا او طالبانو ترمنځ د سولې د موافقې تضمین کوونکی واوسي.
پرون ناوخته په قطر کې سرچینو تاند ته وویل چې د امریکا او طالبانو ترمنځ د سولې موافقه نهايی شوې ده خو لږ وروسته امریکايي پلاوي د موافقې د پښتو او انګلیسي متن د ځینو ټکو وضاحت وغوښت او ویې ویل، مخکې تر دې چې موافقه نهايي شوې اعلان کړي، ښه ده چې مجهول یا هغه الفاظ چې څو معناوې ورکولی شي، تعریف شي.
د رویټرز خبري اژانس د راپور له مخې، تاس خبري اژانس د روسیې د باندنیو چارو وزارت د ویندویې ماریا زاخارووا په قول راپور ورکړ، سرګی لاوروف نن (چهارشنبه) وویل«روسیه تیاره ده چې د امریکا د متحدو ایالتونو او د طالبانو د تحریک ترمنځ د موافقې د لاسلیکوونکو درېم اړخ یا تضمینوونکی وي.»
تر دې مخکې د روسیې د بهرنیو چارو وزیر ښاغلي لاوروف نن د هند له بهرنیو چارو وزیر سره په یوه خبري غونډه کې مسکو د تروریزم پر ضد په جګړه کې د افغانستان د ملي اردو او امنیتي ځواکونو ملاتړ ته دوام ورکوي.
ده وویل«موږ د افغانستان ملي اردو او امنیتي ځواکونو ته وسلې او تجهیزات ورکوو او دې ته به دوام ورکړو. دوی حاضردمه په یوازې توګه نه شي کولی چې د تروریزم خطر له منځه یوسي نو هلوځلو ته اړتیا ده.»
ټاکل شوې ده چې د طالبانو او امریکایانو ترمنځ د موافقې د مسودې له نهايي کېدو وروسته د افغانستان د سولې لپاره د امریکا ځانګړی استازی مسوده کابل ته یوسي او له ولسمشر غني سره پرې خبرې وکړي.
د افغانستان حکومت ویلي، هیڅ موافقه تر هغه د منلو نه ده چې د افغانستان قانوني حکومت تایید کړې نه وي. په بل پړاو کې به موافقه په یوه درېمګړي هیواد کې لاسلیک شي.