تاند، جمعه، د سنبلې ۲۹مه: پوهنې وزارت وايي، ډېر ژر به د افغانستان د ښوونځیو د لېسې دوره د ساینس او ټولنیزو علومو په څانګو ووېشي.
وزارت وايي، په دې تړاو یې خپله طرحه جوړه کړې او نظر پوښتنې ته یې هم وړاندې کړې ده چې د خلکو له تایید وروسته به پرې عملي اقدامات پیل کړي.
د پوهنې وزارت ویانده نوریه نزهت وايي، دا طرحه د یو نړیوال معیار له مخې جوړه شوې او وزارت غواړي چې د پوهنې د کیفیت د ښه والي لپاره یې په ښوونځیو کې عملي کړي.
نوموړې وایي، په دې طرحه کې د هېواد له کورنیو پروفیسرانو تر څنګ د امریکايي پوهنتون له استادانو هم مرسته اخیستل شوې ده او ټولو دا اړینه بللې ده چې په افغانستان کې دې ښوونیز بهیر په مشخصو څانګووویشل شي.
د پوهنیز بهیر د تاریخ پوهانو په وینا، د افغانستان لپاره د لیسې په دوره کې د څانګو ویش کومه نوې خبره نه ده بلکې څلویښت کاله وړاندې د سردار داوودخان د واکمنۍ پرمهال دا طرحه د هغه وخت په یو شمېر محدودو ښوونځیو کې د اجرا وړ وه.
دا مهال په افغانستان کې تر ۱۲م ټولګي پورې ۱۶ مضامین لوستل کېږي چې د ساینسي علومو علاقه مند شاګردان مجبور دي ټولنیز علوم زده کړي تر څو خپلې نومرې په کانکور او شهادت نامه کې بشپړې کړي.
دغه راز د ټولنیزو علومو لیواله زده کوونکي اړ دي چې ساینسي علوم په ډېره سختۍ زده کړي تر څو کانکور او شهادتنامه کې له ستونزو سره مخ نشي.