تاند، جمعه، د سنبلې ۲۹مه: د سنبلې د بښنې نړیوال سازمان په ننګرهار ولایت کې د داعش ډلې پر پټنځایونو د برید په ترڅ کې د ۱۸ ملکیانو په وژنه سخت غبرګون ښودلی او وايي، دا کار د منلو نه دی.
د ننګرهار امنیتي چارواکو تېره ورځ تایید کړه چې د ننګرهار په خوږیاڼو ولسوالۍ کې د بې پیلوټه الوتکې برید ۱۸ ملکیان وژلي او ۶ نور یې ټپیان کړي دي.
خو د بښنې نړیوال سازمان په خپله اعلامیه کې دا برید غندلی وايي، امریکايي ځواکونه دې په عملیاتو کې د ملکیانو خوندیتوب ته پام وکړي.
د بښنې نړیوال سازمان دغه راز په زابل- قلات کې هم د طالبانو برید غندلی او پر ښکیلو لوریو یې غږ کړی دی چې نور دې تاوتریخوالي ته د پای ټکی کېږدي.
دا په داسې حال کې ده چې د امریکايي ځواکونو یو ویاند ډګروال سنيلګیټ د خوږیاڼو د برید په تړاو الجزیرې ته ویلي دي چې د خوږیاڼو برید کې يې زیات تلفات داعشیانو ته اړولي دي، خو دا ادعاوې به وڅېړي چې په برید کې رښتیا هم ملکیان وژل شوي که نه؟
همدا راز طالبانو هم د قلات د برید په سپیناوي کې ویلي دي چې د دوی هدف د ملي امنیت لوی ریاست و، مګر لیدل شوي چې د طالبانو برید کې ملکي روغتون له منځه تللی، ۲۰ ملکیان په کې ټپیان دي او نږدې ۱۰۰ نور ټپیان ښودل شوي دي.