تاند، دوشنبه، د میزان ۸مه: د تخار ولایتي چارواکو نن دوشنبه سهار اعلان کړه چې د دې ولایت په مرکز تالقانو ښار یې د طالبانو لوی برید شاته تمبولی دی.
داسې راپورونه وکول شوي وو چې طالبان تېره شپه د تالقانو ښار په ځینو برخو د دغه ښار د سقوط په هدف ننوتي وو، خو نن سهار ښار کې ژوند بېرته پيل شوی دی.
د تخار د والي ویاند محمد جواد هجري بیا دا خبره تاند ته تایید نه کړه خو وايي، طالبانو له څو ورځو راهیسې د ټاکنو د ګډوډولو په هڅه تالقانو ته نږدې بهارک ولسوالۍ باندې بریدونه پیل کړي او تر ښاره رارسېدلي وو.
نوموړی وايي، تېره شپه پر طالبانو د هوايي ځواکونو په بریدونو کې ۳۶ وسله وال وژل شوي او د ښار امنیتي وضعیت تر کنټرول لاندې دی.
طالبانو بیا په دې تړاو څه نه دي ویلي.