تاند- د پاکستان حکومت په اسلام اباد کې له فرقوي شخړې وروسته په راولپنډۍ ښار کې په ګرځېدو بندیز لګولی دی.
پرون په اسلام اباد کې د شیعه ګانو او سنیانو ترمنځ په شخړه کې اته سنیان ووژل شول.
دا شخړه په داسي حال کې وشوه چې شیعه ګانو د عاشورا په مناسبت ماتم کاوه. د عاشورا ورځ شیعه وو ته په ځانګړي ډول زیاته مهمه ده. دوی په دې ورځ ویر کوي او خاص مراسم پرځای کوي.
د پنجاب یوه ایالتي چارواکي شعیب بن عزیز نن وویل چې د راولپنډۍ اوسېدونکو ته امر شوی چې تر بلې خبرتیا پوري له کورونو راونه وځي.
حاضردمه د راولپنډۍ او اسلام اباد پر واټونو او سړکونو پولیس او پوځیان ګزمه کوي.
د پولیسو یوه چارواکي محمد وسیم وویل چې په شخړه کې ۳۵ تنه نور ژوبل شوي دي.
ویل شوي چې شیعه ګانو ګڼو دواکانونو ته اور ورته کړ.
د اطفاییې یوه مسوول چارواکي محمد مظهر وویل چې تېره شپه د شیعه ګانو دوو جوماتونو ته اور ورته کړای شوی دی.
په افغانستان کې د عاشورا مراسم د سختو امنیتي تدابیرو په منځ کې بې له کومې پېښې په ځای شول.