تاند، چهار شنبه، د عقرب لومړۍ: د ننګرهار ځايي چارواکي وايي، په اچین ولسوالۍ کې یې د عملیاتو په ترڅ کې د داعش ډلې ۶۲ جنګیالي وژلي، ۳۲ نور یې ټپیان کړي خو خپل ۱۰ سرتېري یې هم په جګړه کې وژل شوي دي.
د ننګرهار د والي ویاند عطا الله خوږیاڼي تاند ته وویل، والي شاه محمود میاخېل اچین ولسوالۍ ته سفر کړی او د یوې نیمې میاشتې راهیسې د روانو عملیاتو په ترڅ کې یې د دغې ولسوالۍ امنیتي وضعیت ارزولی دی: (( په دغو عملیاتو کې ۶۲ داعشیان وژل شوي چې زیاتره یې بهرنیان دي، همداراز ۳۲ نور ټپیان دي، زموږ ۱۰ سرتېري هم په شهادت رسېدلې او ۴ نور ټپیان دي.))
نوموړی وايي، په دې عملیاتو کې د داعشیانو ۳۰۰ ماینونه کشف او خنثی شوي دي.
د سیلاب قول اردو قومندان عبدالهادي ترین بیا وايي، د دغو عملیاتو په ترڅ کې یې ګڼې سیمې له داعشیانو پاکې کړې دي او له دې وروسته به څو بېزونه او پوستې هم واچوي تر څو داعشیان بیا راونه ګرځي.