تاند، پنجشنبه، د عقرب ۲مه: د کلیو پراختیا وزیر مجیب الرحمن کریمي پکتیا ته د سفر په ترڅ کې د لس میلیونه ډالرو په ارزښت د ۱۰۳ ښوونځیو جوړولو وعده ورکړې چې په وینا یې ۴۳ زره زده کووونکي پکې لازم درسي چاپېریال ومومي.
ښاغلی کلیمي وايي، په ۱۳۹۸ کال کې یې د پکتیا د خلکو لپاره ۱۳۲ پروژې پلې کړې دي چې ۱۲۳ میلیونه افغانۍ پرې راغلې دي او ۱۳۷ زره کسانو ته په کې د کار زمینه برابره شوې ده.
نوموړی وايي، په راتلونکي کې به هم د اقتصاد، ټرانسپورټ او انرژۍ په برخه کې د پکتیا لپاره د ۹۶۷ میلیونه افغانیو په ارزښت ۶۰۰ پروژې پلې کړي چې څلور سوه زره کورنیو ته به ترې ګټه ورسېږي.
نوموړی وايي، د لمریزې بریښنا لپاره یې هم په پکتیا کې تر اوسه ۱۴ زره او ۶۶۵ کورنۍ په ځاځي اریوب او ډنډ پټان ولسوالیو کې سروې کړې دي.