تاند، یکشنبه، د عقرب ۵ مه: د ټاکنو په کمېسیون کې د عبدالله عبدالله یو پلوی کمشنر وایي، د ټاکنو د تعدیل شوي قانون په اساس به له ۷۰۰ څخه تر ۹۰۰ زرو پورې رایې باطلې اعلان شي.
مولانا عبدالله پر خپله فیسبوک پاڼه لیکي، د پاکو او ناپاکو رایو د تصفیې پروسه لا هم روانه ده او تر اوسه د بایومتریک شویو رایو شمېر ۱۷۹۱۷۰۳ تر ۱۹۲۹۳۳۳ رسېږي چې له دې منځه ۱۳۷۶۳۰ رایې د بحث وړ دي.
ښاغلی عبدالله، چې په ښکاره د ولسمشرۍ د کاندید او اجراییه رييس عبدالله عبدالله ننګه کوي، وایي، هغه ولایتي مسوولان به عدلي او قضایي ادارو ته معرفي شي چې د ولایتي درغلیو راپور یې نه دی ورکړی.
د یادونې ده کمیسیون لومړنیو وختونو کې ویلي و چې ټول ټال ۲ میلیونه او ۷۰۰ زره رایې اعلان کړې وې خو بیا یې وویل چې بایومتریک شوې رایې ۱ میلیون او ۹۰۰ زره دي.
د یادونې ده چې د عبدالله عبدالله انتخاباتي ډله او د دې ډلې پلوي رسنۍ ډېر تبلیغ کوي چې انتخابات ګډوډ او بحراني وښيي. دوی دغه راز تبلیغ کوي چې انتخابات دوهم پړاو ته ځي.