تاند، دوشنبه، د عقرب ۱۳مه: ولسي جرګې، په دفاعي چارو کې د سرتېرو ذاتي قانون د رایو په اکثریت تصویب کړ.
نن دوشنبه د ولسمشر د تقنیني فرمان له مخې د ولسي جرګې عمومي غونډه د امنیتي او دفاعي چارو د کمېسیون لخوا د دغه قانون په اړه ځانګړې شوې وه.
د ولسي جرګې د دفاعي چارو د کمېسیون غړي علي اکبر جمشېدي تاند ته وویل، د سرتېرو ذاتي قانون د ولسمشر د ۳۴۸ ګڼه فرمان له مخې په هېواد کې نافذ شوی دی خو د قانوني مراحلو لپاره ولسي جرګې ته هم استول شوی و چې نن تصویب شو.
دا قانون چې ۸ فصلونه او ۶۰ مادې لري د اساسي قانون له مخې د سرتېرو د جلب و جذب، د وجایبو د تنظیم، حقوق، امتیازات او د سرتېرو ټولې شخصي اړتیاوې په کې په پام کې نیول شوې دي، چې د ولسي جرګې د دفاعي چارو د کمېسیون د غړي علي اکبر جمشېدي په وینا یوازې ۳۰مه ماده یې تعدیل او نور قانون د رایو په اکثریت د وکیلانو لخوا ومنل شو.
د ولسي جرګې مشر دا قانون نن د ۱۵۶ تایید او ۱۵ رد رایو په ترلاسه کولو تصویب شوی اعلان کړ.
نن ولسي جرګې ته ۱۷۱ وکیلان راغلي وو.