تاند- (پنجشنبه، د قوس ۷) د امریکا د سمندري استخباراتو پخوانی افسر، چې پر امریکا د ۲۰۰۱ کال د سپټمبر د یوولسمې له حملو وروسته یې پر افغانستان د اتومي بمونو د غورځولو وړاندیز کړی و، اوس د متحدو ایالتونو د بهرنیو چارو وزارت د وسلو د کنټرول په چارو کې کار کوي.
واشنګټن پوسټ ورځپاڼې د چهارشنبې په ورځ دا خبره د دوو امریکايي چارواکو له قوله، چې له دې مسلې خبر دي، افشا کړه.
د امریکا د بهرنیو چارو وزارت د وسلو د کنټرول د څانګې د لوی سلاکار په توګه د فرانک وکو پر دندې وروسته له دې انتقادونه وشول چې د ده پخوانۍ افراطي څرګندونې او نظریې مطرح شوې.
ده په خپلو څرګندونو کې دا ادعا هم کړې وه چې پخوانی ولسمشر بارک اوباما په امریکا کې نه دی زېږېدلی، د سي آی اې پخوانی رييس جان برینان مسلمان شوی، پخوانی لوی څارنوال ایریک هولډر د بلک پانترز ډلې غړی دی او د هیلري کلنټن سلاکاره هما عابدین له اخوان المسلمین سره اړیکې لري.
کله چې تېر کال سي این این تلویزیون د وکو په اړه دا څرګندونې خپرې کړې، ده هماغه مهال د امریکا د کورني امنیت په وزارت کې کار کاوه خو اوس نوموړی د امریکا د بهرنیو چارو وزارت د وسلو د کنټرول د څانګې سلاکار دی.
واشنګټن پوسټ وايي چې د امریکا د بهرنیو چارو وزارت په دې اړه له څه ویلو دډه کوي.
ده د ۲۰۰۱ د سپټمبر له یوولسمې وروسته ویلي و چې پکار ده چې پر افغانستان څو نسبتاً کمزوري اتومي بمونه وغورځول شي څو نړۍ ته دا پیغام ورسول شي چې امریکا خپل غچ خورا سخت اخلي.
اوس یی کوم رحم کړی دی د بمونو نیاه نیکه پلار او مور یی ټول استعمال یی کړه
فکر کووم فرانک وکو عقلی او عصبی مریض دی. د امریکا حکومت، بشردوستان او قانون جوړوونکی باید دغه سړی د لیونتون روغتون ته وروسپاری