تاند، چهار شنبه، د جدي ۱۱مه:افغان ځواکونو په زابل او کندهار ولایتونو کې د عملیاتو په ترڅ کې ۲۴ وسله وال طالبان ژوندي نیولي دي.
د کندهار د امنیه قومندانۍ ویاند ویاند جمال ناصر بارکزی وايي، د کندهار پولیسو ۷ تنه وسله وال نیولي چې غلچکي بریدګر او جنګي طالبان هم په کې شامل دي.
په همدې حال کې د کندهار ملي امنیت ریاست هم وايي چې د وسله والو یوه لس کسیزه ډله یې نیولې چې ګڼو ترهګریزو پېښو کې یې لاس درلود.
بلخوا د اتل ۲۰۵ قول اردو ویاند جګړن یحیی علوي وايي، تېره شپه د زابل، شینکۍ ولسوالۍ په عمرزیوکې د عملیاتو پر مهال د سرتېر لخوا ۷ تنه وسله وال ژوندي نیول شوي او ۲ تنه وژل شوي دي.
د چارواکو په وینا نیول شویو کسانو په خپلو ترهګریزو فعالیتونو ورته اعتراف کړی دی خو طالبانو بیا په دې اړه څه نه دي ویلي.