زاخیلوال: د سولې هوکړه کې دواړه لوري یو پر بل بې باوره دي

تاند، شنبه، د دلوې ۱۲مه: د ولسمشر ارشد پخواني سلاکار او پاکستان کې د افغانستان پخواني سفیر حضرت عمر زاخیلوال له افغانستان رو خبري شبکې سره په یوه مرکه کې ویلي، د سولې د هوکړې د لاسلیک اصلي مانع د دواړو لوریو تر منځ بې باوري ده.

نوموړی وايي، په دوحه کې وروستي مذاکرات د هوکړې په جزیاتو نه بلکې د اعتماد سازۍ د فضا رامنځته کولو په اړه روان وو.

زاخیلوال همداراز وايي، مذاکراتو ته هیله من دی خو دا مذاکرات په یوه او دوه ناستو د پنځو لسیزو جګړه نه شي ختمولی: (( زه هیله لرم چې حکومت د سولې مذاکراتو کې خنډ جوړ نه کړي او مؤثر او مسوولانه رول ولوبوي، موږ ټول د نظام بقا غواړو.))

د زاخیلوال په خبره د سیمې د هیوادونو تر منځ رقابتونه افغان سوله کې خنډ ایجادولی او جګړې ته شدت ورکولی شي، خو په وینا یې پاکستان لپاره له امریکا سره اړیکې مهمې دي له همدې کبله څومره چې د سولې مذاکرات پرمختګ کوي، پاکستان هومره له امریکا سره بیرته نږدې کېږي.

حضرت عمر زاخیلوال همدا راز د تاوتریخوالي د راکمولو په اړه د افغان حکومت د قناعت لپاره ټینګار کوي او وايي، اوربند د ټولو غوښتنه ده، مګر د تاوتریخوالي راکمول هم باید چې استقبال شي.

نوموړی په دې باور دی چې له طالبانو سره له سولې وروسته په افغانستان کې سراسري سوله تامینیږي او دا وېره بې ځایه ده چې جګړه به ونه درېږي، ځکه د زاخيلوال په باور داعش په افغانستان کې ځای نه لري او پروژه یې ناکامه شوې ده.