افغانستان ته هره ورځ د کبانو ۱۲۰ ټنه بې کیفیته غوښه راځي چې د داخلي کبانو بازار یې خراب کړی

تاند، شنبه، د دلوې ۱۹مه: د کرنې او سوداګرۍ وزارتونو شمېرې ښيي چې افغانستان ته په نورمال ډول د ورځې ۴۰ ټنه او په ژمي کې بیا هره ورځ ۱۲۰ ټنه د کبانو غوښه په قاچاقي او وارداتي ډول راځي.

د کرنې وزارت د کبانو د روزنې پروژې مسوول خلیل فروغ تاند ته وايي، افغانستان په کور دننه په خپله هم د کال ۱۱۵۰۰ ټنه د کبانو غوښه تولیدوي چې بازار یې قاچاقي بې کیفیته غوښو خراب کړی دی.

نوموړی وايي، د کرنې وزارت د معلوماتو له مخې په افغانستان کې د کبانو د روزنې فارمونو تر نورو ټولو فارمونو زیاته ګټه کړې او خاوندان یې له تولیداتو څخه سمه نیمه ګټه ترلاسه کوي: (( که څوک ۲ لکه افغانیو کبان پلوري ۱ لک په کې ګټه کوي، موږ غواړو چې په هیواد کې ۳۵ زره فارمونه جوړ کړو، تر څو له هیواده بهر هم صادرات ولرو.))

د فروغ په خبره د کرنې وزارت په تېرو دریو کلونو کې د قرغې په بند کې ۳۸۰ زره کبان خوشې کړي، د سلما بند کې یې ۵۰ زره کبان خوشې کړي او د نغلو په شمول سالنګونو سیند، غوربند سیند او د کونړ سیند کې یې هم په ورته شمیر کبان خوشې کړي دي: (( د دې تر څنګ موږ کوشش کوو چې د کبانو بومي نسلونه اصلاح کړو د دې لپاره یو تحقیقاتي فارم جوړوو چې د خالدار کب نسل ترې اصلاح کړو او وده ورکړو، ځکه د افغانستان د امو سیند خالدار کب ډیر مشهور دی.))

نوموړی تاند ته وايي، وزارت یې دمګړۍ په افغانستان کې ۲۳۵۰ فارمونه دي او راتلونکی کال به د ۸۰ نویو تولیدي فارمونو تر څنګ په بلخ، پنجشیر، ننګرهار او بامیانو کې د کبانو تکثیري څلور نور فارمونه هم جوړ کړي.

هغه زیاته کړه افغان حکومت په راتلونکي کې پلان لري چې د کبانو ۳۵ زره فارمونه، شل د کبانو د تکثیر فارمونه او درې د کبانو د غذايي تولید فابریکې رامنځته کړي تر څو له هیواده بهر هم صادرات ولري.