تاند، سه شنبه، د حوت ۶مه: امریکا له ټاکنیزو پایلو وروسته په افغانستان کې د موازي حکومتونو له رامنځته کولو سره مخالفت ښودلی او دا یې د افغانستان لپاره په زیان بللی دی.
د امریکا د باندنیو چارو وزارت ویلي، د ولسمشر غني د بریا اعلان تاییدوي او له ارګ څخه یې مننه کړې ده چې د ولسمشرۍ د لوړې مراسم یې وځنډول.
د راپورزونو له مخې، ولسمشر غني د لوړې مراسم دوې اوونۍ ځنډولي دي. مخکې ټاکل شوې وه چې راتلونکې پنجشنبه ولسمشر غني لوړه په ځای کړي.
د امریکا د بهرنیو چارو وزارت په اعلامیې کې په افغانستان کې له ټولو ډلو غوښتل شوي چې د سولې خبرو لپاره په یو ملي چوکاټ موافقه وکړي چې د افغانستان د اسلامي جمهوریت بشپړ استازیتوب وکړي او دا خبرې مخ ته بوځي: “د دې لپاره چې ټول افغانان په دغو مسایلو د موافقې لپاره پوره وخت ولري، موږ له افغان حکومت څخه مننه کوو چې د ولسمشر د لوړې مراسم یې وځنډول.”
د امریکا د بهرنیو چارو وزارت اعلامیه وايي، د دې وخت رارسیدلی چې پر انتخاباتي سیاست باندې تمرکز نه بلکې د سولې پر لور ګامونه پورته شي. تر څو له طالبانو سره جگړه پای ته ورسیږي او د بین الافغاني خبرو له لارې د سیاسي حل لپاره یو فورمول وموندل شي چې د هیواد ټولو وگړو ته د منلو وړ وي.
اعلامیې همدغه راز د هغو اقداماتو د ددرېدو غوښتنه کړې ده چې د افغانستان ملي حاکمیت زیانمنوي: “د موازي بنسټونو د جوړولو په ګډون چې د اساسي قانون خلاف دي، د ټولو بي ثباته موازي اقداماتو څخه دې ډډه وشي. دا ډول اقدامات د افغانستان حاکمیت او ملي وحدت چې امریکا يې کلکه ننګه کوي، کمزوری کوي.”
http://www.archive.www.archive.taand.com/archives/145115
تر دغې اعلامیې څو شېبې مخکې د امریکا د بهرنیو چارو وزیر مایک پامپیو وویل چې په افغانستان کې یو لوی سیاسي فرصت رامنځ ته شوی چې باید زیانمن نشي.
ټاکل شوې چې د شنبې په ورځ (فبروري ۲۹) د امریکا- طالبانو ترمنځ تړون لاسلیک شي چې له تړون وروسته به بیا په مارچ کې بین الافغاني مذاکرات پیل کیږي.
د امریکا د بهرنیو چارو وزارت د اعلامیې له خپرېدو څو شېبې وروسته د عبدالله عبدالله انتخاباتي ټیم اعلان وکړ چې نور د والیانو د معرفي کولو لړۍ دروي. دې ټیم ویلي چې خپلو پلویانو ته یې ویلي و چې سبا (چهارشنبه) د تخار د نوي والي لپاره د دې ډلې د نوي والي د معرفۍ په مظاهره کې ګډون وکړي خو اوس یې خپلو پلویانو ته ویلي چې دا مراسم یې لغوه کړي دي.