د طالبانو او امریکایانو د موافقې غټ ټکي څه دي؟

تاند – په افغانستان کې د سولې د راوستلو لپاره د امریکا او طالبانو ترمنځ موافقه ۳ برخې لري.

د دې موافقې په لومړۍ برخه کې، چې نن په دوحه کې د طالبانو د قطر د دفتر مشر ملا عبدالغني برادر او د افغانستان د سولې لپاره د امریکا ځانګړي استازي زلمي خلیلزاد لاسلیک کړه، ویل شوي چې د سولې هراړخیزه موافقه څلور برخې لري.

لومړی د داسې میکانیزم تضمین چې د افغانستان خاوره د هیڅ ډلې یا فرد له لوري د امریکا او یا د دې هیواد د متحدانو پر ضد به نه کارول کېږي.

۲- له افغانستانه د ټولو بهرنیو پوځیانو د وتلو د مهالوېش لپاره ضمانتونه، د میکانیزمونو پیاوړتیا او اعلان.

۳- طالبان به د روان ۲۰۲۰ د مارچ په لسمه بین الافغاني خبرې پیلوي.

۴- دایمي او هراړخیز اوربند به د افغانانو ترمنځ د مذاکرو او دیالوګ د اجندا برخه وي. د بین الافغاني خبرو برخوال به د بشپړ او هراړخیز اوربند پر نېټې او څرنګوالي خبرې وکړي.

http://www.archive.www.archive.taand.com/archives/145396

په دې موافقه کې امریکا منلې چې په ۱۳۵ ورځو کې به په افغانستان کې د خپلو پوځیانو شمېر ۸۶۰۰ تنو ته رالږ کړي او په همدې تناسب به د نورو متحدو هیوادونو د ځواکونو شمېر کم کړل شي.

امریکا او متحدان به یې په افغانستان کې له ۵ اډو خپل پوځیان وباسي.

امریکا او متحدان به یې خپل ټول پوځیان وروسته په نهه نیمو میاشتو کې وباسي.

يه دې اعلامیه کې طالبانو ته د افغانستان اسلامي امارت لیکل شوي خو ورسره یوځای دا هم لیکل شوي چې امریکا دا ډله د امارت په توګه نه بلکې یوازې د طالبانو په توګه پېژني.