عبدالله خپل مذاکراتي پلاوی او خپل ۴ نوي والیان ټاکي

تاند، سه شنبه، د حوت ۱۳مه: اجرائيه ریاست وایي، د بین الافغاني مذاکراتو لپاره یې له خپل لوري د ټاکل کېدونکي پلاوي نوملړ نهایي کړی دی.

د اجرائیه ریاست ویاند امید میثم ویلي، سپیدار ماڼۍ او د ثبات او همپالنې ټیم له سیاسیونو او مشرانو سره تر سلا مشورو وروسته د پلاوي نوملړ نهایي کړی او تمه ده چې ارګ د حکومت د یوې برخې په توګه په هغه کې برخه واخلي.

بلخوا د ثبات او همپالنې انتخاباتي ډلې یوه غړي فضل احمد معنوي هم ویلي چې د امریکا او طالبانو تر منځ د سولې له هوکړې وروسته د ولسمشرۍ انتخاباتو د لانجو د حل په برخه کې هېڅ پرمختګ نه دی شوی او اوس چې ولسمشر غني د لوړې مراسمو لپاره بېرته چمتووالی پیل کړی، نو عبدالله عبدالله هم په ولایتونو کې والیان معرفي کوي: (( هغو کسانو چې هم د امریکا او هم د افغان سیاستوالو له لوري منځګړیتوب کاوه هغوی هم اوس کوم تګ راتګ نه لري، اوس چې ارګ د لوړې مراسمو لپاره چمتووالی نیسي، اجراییه ریاست هم په دې اړه بېرته خپلې ناستې پیل کړې او د والیانو د معرفي کېدو بحث یې بیا پیل کړی.))

د ثبات او همپالنې انتخاباتي ډلې مشر عبدالله عبدالله ته یوې بلې نږدې سرچیني هم تایید کړې، چې ټاکل شوې په تخار، بدخشان، فاریاب او دایکندي ولایتونو کې د عبدالله عبدالله له لوري والیان معرفي شي.

دا په داسې حال کې ده چې تر دې مخکې د پخواني ولسمشر حامد کرزي او جهادي مشر عبد رب رسول سیاف په منځګړیتوب د ټاکنیزو لانجو د هل لپاره هلې ځلې پيل شوې وې.

تازه پخواني ولسمشر حامد کرزي او استاد سیاف یو ځل بیا له ډاکتر عبدالله سره کتلي دي.