بلاول بوټو: سوله کې افغان حکومت نه و، دا سوله نه بریالۍ کېږي

تاند، سه شنبه، د حوت ۱۳مه: د پاکستان د خلکو ګوند یا پيپلز پارټۍ د امریکا او طالبانو د سولې په هوکړه نیوکه کړې او ویلي یې دي، د افغان حکومت په څېر له یو باصلاحیته لوري شاملولو پرته به دا هوکړه بریالۍ نه شي.

د پیپلز ګوند مشر بلاول بوټو زرداري په یوه اعلامیه کې ویلي، یوازې افغان رهبري او د افغانانومالکیت په سیمه کې د ثبات راوستلو جوګه کېدلای شي، مګر د سولې پروسه له افغان حکومت، افغان وګړو، افغان ملي شورا او افغانو ښځو له ګډون مخته تللې په داسې حال کې چې هره ورځ بریدونه هم په دغو خلکو کېږي.

بلاول بوټو زرداري دا اعلامیه په داسې حال کې د رسنیو پر وړاندې ولوسته چې د پاکستان پخوانی لومړی وزیر راجه پرویز اشرف او د ګوند نور لوړ پوړي غړي قمر زمان کایره، چودري منظور، د سند ایالت وزیر ناصر شاه او منور انجم یې هم په خوا کې ناست وو.

http://www.archive.www.archive.taand.com/archives/145558

بلاول بوټو زرداري ویلي، که مذاکرات د افغانانو په ګټه وي او څلویښت کلن ناورین ته په کې جمهوري حل لاره را ایستل کېږي، نو هرکلی یې کوي، خو که دا پروسه د امریکا د ولسمشر په یو ټویټ داسې پيل شوې وي چې افغان حکومت په کې شامل کړای شوی نه دی نو د امریکا او طالبانو د خپلمنځي هوکړې بریاليتوب له شک سره مخ کېږي.

بلاول بوټو ویلي، که پاکستان غواړي چې په امریکايي ټاکنو کې د ټرمپ له بریا سره مرسته وکړي، نو دا سوله به سوله رانه وړي او نه به پاکستان یا افغانستان ته کومه ګټه وکړي.