تاند، جمعه، د حوت ۲۳مه: د ملي امنیت شورا اعلان کړه چې طالبانو سره د بندیانو په رابطه د خبرو لپاره استولې د تماس ډله یې له قطر څخه کابل ته بېرته راستنه شوې ده او ډېر ژر به دوی یو بل پلاوی د حسن نیت په نوم دوحې ته واستوي.
د ملي امنیت شورا لخوا تاند ته په دې اړه استول شوې خبرپاڼه کې راغلي چې دغه شپږ کسیزه ډله یې له امریکا سره په همغږۍ او د قطر دولت په غوښتنه دوحې ته استولې وه چې تېره شپه بېرته هیواد ته راګرځېدلې ده.
امنیت شورا وايي، دغه پلاوي د قر د ملي امنیت له سلاکار، د سولې په چارو کې د قطر له ځانګړي استازي، په قطر کې د امریکا له لوړ پوړو سفارتي چارواکو، د افغانستان په چارو کې د ملګرو ملتونو له خاص استازي، د انډونیزیا د باندنیو چارو وزیر، افغانستان لپاره د جرمني له ځانګړي استازي او دوحې لپاره د جرمني له سفیر، افغانستان لپاره د ناروې له ځانګړي استازي او نورو چارواکو سره کتلي دي.
په دې پلاوي کې د ملي امنیت شورا استازی سالم شاه ابراهیمي، د سولې په چارو کې د دولت وزارت مرستیال عبدالخالق بالاکرزی، د عدليې وزارت مرستیاله ذکیه عادلي، د باندنیو چارو وزارت استازی فیض الله ذکي، د حج و اوقافو وزارت معین مولوي مظفري، او د زندانونو د تنظیم رئیس ښاغلی توتاخیل شامل وو.
امنیت شورا وايي، افغان دولت به د ښه نیت یو بل پلاوی هم ډېر ژر دوحې ته واستوي، تر څو د سولې مذاکرات پرمختګ وکړي، په داسې حال کې چې طالب سرچینې وايي، له دغه تماس پلاوي سره یې نه دي کتلي.