تاند، شنبه، د حمل ۹مه: د افغانستان مليامنیت شورا وايي، طالبان مشخص زندان نه لري او یوازې هغه مرکزونه لري چې بندیان په کې شکنجه کېږي.
د امنیت شورا ویاند جاوید فیصل نن په کابل کې د یو خبري کنفرانس په ترڅ کې وویل، طالبانو لا جګړه نه ده درولې او د خلکو برمته نیونې ته یې دوام ورکړی دی.
نوموړی وايي، کوم لیست چې افغان حکومت طالبانو ته د خپلو بندیانو په اړه سپارلی، طالبان هومره بندیان نه لري او اوس غواړي د زرو بندیانو د لیست پوره کولو لپاره نور خلک ونیسي.
د جاوید فیصل په خبره افغان ځواکونو سږ کال د طالبانو د شکنجې ګڼ مرکزونه مات کړي او له ۲۶۰ زیات بندیان یې ترې خوشې کړي دي اوس طالبان هغومره بندیان نه لري چې ادعا یې کوي چې د ښه نیت له مخې به زر تنه افغان بندیان خوشې کړي.
نوموړي وویل، د طالب بندیانو د تثبیت په تړاو که څه هم د طالبانو د پلاوي راتګ کابل ته ځنډېدلی خو په لنډ وخت کې به دا پلاوی افغانستان ته راشي او افغان حکومت سره به مذاکرات وکړي.