تاند، دوشنبه، د ثور لومړۍ: نړیوال بانک وايي په افغانستان کې له کورونا سره د بېړنۍ مبارزې لپاره یې افغان حکومت ته ۲۰میلیون ډالر ور ورسول او ۴۰ میلیونه نور هم ورکوي.
نړیوال بانک د اپریل په ۱۲ ژمنه وکړه چې د کروناویروس سره د مبارزې لپاره به له افغانستان سره ۱۰۰.۴ میلیون ډالر مرسته کوي.
اوس دغه بانک وایي، دا ۲۰ میلیون د همدغو مرستو لومړۍ برخه ده چې افغان حکومت ته وسپارل شول.
نړیوال بانک نن دوشنبه په یوې اعلامیې کې ویلي دي چې په دغو مرستو به د افغانستان په ۳۴ ولایتونو کې د کروناویروس د خپرېدو د مخنیوي لپاره روغتیايي خدمتونه برابریږي.
اعلامیه وايي نړیوال بانک همدغه راز ۴۰میلیون ډالر نور هم په پام کې نیولي دي چې د ۲۰۲۰ د جنورۍ له لومړۍ نېټې څخه د کرونا سره په مبارزه کې د افغانستان د حکومت لګښتونه ورکړي.
وايي همدا چې افغان حکومت د خپلو لګښتونو لست ورته تسلیم کړ، هغوی به یې ۴۰ میلیونه ډالر ورکړي.
نړیوال بانک دغه راز ویلي ديچې د مالي مرستو تر څنګ به د روغتیا د نړیوال سازمان، یونیسف او نورو اړوندو ادارو سره ګډ کار کوي چې له افغانستان سره تخنیکي مرستې وشي او وسایل هم برابر شي چې د کورونا ویروس سره د مبارزې پروژه کامیابه شي.
نړیوال بانک داسې مهال افغان حکومت ته دا مرستې سپاري چې د کورونا ویروس تر دې دمه په افغانستان کې ۳۵ تنه مړه کړي او ۱۰۲۶ نور په دغه ویروس اخته دي.