تاند، سه شنبه، د ثور ۹مه: افغانستان له ایران څخه د چرګانو، هګیو او چرګوړو واردات ازاد کړل.
د افغانستان د کرنې وزارت ویاند اکبر رستمي تاند ته وویل، دا کار یې په کورونايي حالاتو کې د هګیو او چرګانو د غوښې د بیو لوړېدو د مخنیوي لپاره کړی دی.
نوموړی وايي، افغانستان څو میاشتو لپاره ۲ نیم میلیونه د چرګانو هګیو ته اړتیا لري چې باید له ګاونډیو هیوادونو راوارد شي او له همدې کبله د کرنې وزارت له سوداګرو سره د ناستې په ترڅ کې له بهره د چرګانو د غوښې او هګیو په وارداتو بندیز لرې کړ.
دا په داسې حال کې ده چې تېره ورځ د ایران سیستان او بلوچستان ایالت چارواکو افغانستان ته په ورځني ډول د ۱۲۰ زره چرګوړو صادراتو ته چتووالی وښود.
د یادونې ده چې اوسمهال په افغانستان کې د یوې خامې هګۍ بیه له ۵ افغانیو څخه ۱۲ او پنځلس افغانیو ته لوړه شوې ده، همدا راز د چرګانو یو کېلو ګرام غوښه هم چې پخوا په ۱۸۰ افغانیو وه اوس ۲۵۰ او ۳۰۰ افغانیو ته لوړه شوې ده.