تاند، یکشنبه، د ثور ۲۱مه: په ننګرهار او مزار شریف ښارونو کې د قرنطین د ختمېدو له پرېکړو وروسته د عامې روغتیا وزارت خبرداری ورکړی چې دا کار به په هیواد کې انساني ناورین رامنځته کړي.
د دغه وزارت مرستیال وحید مجروح نن یکشنبه په دې اړه یو خبري کنفرانس کې وویل، په یو شمېر ولایتونو کې د قرنطین او ګرځبندیز ختمول د کورونا ناروغۍ د اوج ته رسولو په معنا دي.
نوموړي زیاته کړه، د قرنطین ختمول د کورونا د پېښو له زیاتېدو او اوج ته رسېدو کې مرسته کوي چې بیا به د دغې ناروغۍ کنټرول له مدیریته ووځي: (( د قرنطین په ختمولو به د ناروغانو شمير زیات او بشري ناورین به رامنځته شي.))
دا په داسې حال کې ده چې د ننګرهار، کندوز او بلخ چارواکو په دغو ولایتونو کې د خلکو د زیاتو غوښتنو له امله ګرځبندیز او قرنطین ختم کړی دی.
په همدې حال کې د هېواد په کچه له تېرو ۲۴ ساعتونو راهیسې ۳۶۱ د کورونا مثبتې پېښې ثبت شوې دي چې ټول شمېر یې ۴۴۰۲ ته لوړ شوی دی.