د ۵۰ زرو تنو لپاره لس ملیارد ډالري بېړۍ

تاند- دا ستره بېړۍ، چې یوه ټاپو ته ورته ده، د هستوګنې لپاره جوړه شوې ده. په دې بېړۍ یا ښارګي کې د ژوند تقریباً ټولې اسانتیاوې په پام کې نیول شوي. د تفریح لپاره له پارکه رانیولې، د کار تر دفترونو، ورزشي میدانونو او هوايي ډګر پوري هرڅه پکې موندل کېږي.

په سمندر کې دا بېړۍ یا ښارګی، چې په جوړولو یې لس ملیارد ډالره لګېدلي دي، فریډم (Freedom) نومېږي.

د «فریډم» بېړۍ د استفادې وړ ځای په ۲۵ پوړونو کې یو ملیون او اووه سوه مترمربع دی. اوږدوالی یې ۴۵۰۰ فوټه، پلنوالی یې ۷۵۰ فوټه او لوړوالی ۳۵۰ فوټه دی.

له سیلانیانو او عملې پرته، شاوخوا ۵۰ زره تنه په دې ښارګي کې اوسي.

په دې بېړۍ کې له ګمرکي محصول پرته (بې مالیې) نړیوال سوداګري مرکز یا شاپنګ مال، ښوونځي، روغتونونه، کتابتونونه، پلورنځي، عادي دوکانونه، غرفې، عمده پلورنځي، بانکونه، هوټلونه، رستورانونه، ګودامونه، دفترونه، لوبغالي، چمنونه، ونې او ازاد ځایونه شته.

د بېړۍ پر بام د کوچنیو شخصي او کرايي الوتکو لپاره هوايي ډګر موجود دی. هره الوتکه څلوېښت سپرلي وړلی شي.

دا ښارګی (بېړۍ) تل د حرکت په حال کې وي ځکه ډېر خلک غواړي چې پکې واوسي او تل نوي – نوي ځایونه وویني.

په دې ښارګي کې، چې کله د نړۍ په یوه سر کې وي او که په بل سر کې، موبایل ټېلفون، انترنټ او د عصري ژوند نور ټول لوکس وسایل موندل کېږي.