تاند- پاکستان، چې عام افغانان یې د افغانستان په ټولو بریدونو کې په لاس لرلو تورنوي، د کابل د سرینا هوټل حمله وغندله.
د سرینا هوټل په برید کې د دوو ماشومانو او دوو ښځو په ګډون ۹ تنه ووژل شول چې د هغوی په منځ کې ۴ بهرنیان ول.
د پاکستان د بهرنیو چارو وزارت ویندویې تسنیم اسلم تېره شپه په یوه اعلامیه کې وویل:«اسلام اباد د کابل پر سرینا هوټل انتحاري حمله غندي او دا ډول انساني ضد او تروریستي بریدونه ناروا بولي.»
مېرمن اسلم همداراز ویلي، د پاکستان حکومت او خلک د دې پېښې د قربانیانو له خپلوانو سره خواخوږي څرګندوي.
اغلې اسلم وویل«د کابل د سرینا هوټل په تروریستي حمله کې د ټپي شویو کسانو په منځ کې یو پاکستانی هم شامل دی او هغه سخت ژوبل شوی دی.»
د سرینا هوټل په برید کې وسله والو سخت دریځو، چې شمېر یې د کورنیو چارو وزارت ۴ تنه ښودلی، یو افغان خبریالان سردار احمد له خپلې مېرمن او دوو تنکیو ماشومانو سره وواژه.
ویل شوي چې څلور بهرنیان د نیوزیلنډ، هند، بنګله دېش او استرالیا اتباع دي.
مخکې ویل شوي و چې د هغوی په منځ کې یو پاکستانی هم شامل دی خو په کابل کې د پاکستان سفارت په دغه برید کې د کوم پاکستاني د وژل کېدا خبر رد کړ.
د پاکستان د لاهور ښار د یوه څو ملیتي شرکت اجراییه رييس احمد شېرجیل زیدي، چې د حملې په مهال په هوټل کې و، سخت ټپي شوی دی.