ځينې خوبه مې بايد
ليدلي وای
په تېره هغه خوبونه
چې ګلونه پکې ليوني کېږي
د هغو ګونګروګانو خوب
چې د ګاټو
پر رګونو به شرنګېږي
د هغو عطر خوب
چې ترخه دي
او تر اوسه چا نه دي پورې کړي
د هغو شعرونو خوب
چې له ما وروسته به
د ريل ګاډي
په سفر کې لوستل کېږي
د هغو لارو خوب
چې مڼې ورپورې ځوړندې دي
او لاره يې موزيکاله دي
خير
که زه نه وم
غواړم دغه ټول خوبونه ووينې
په تېره
د ريل ګاډي خوب
————————————-
په زور د خواهشاتو شرنګیده ولمبیده
بیګاه په جنتي موسم کې شپه ولمبیده
په اور د عاطفې یې دړې وړې پیغلتوب
په اور دعاطفې کې بلیده ولمبیده
دشاتو کټوري یې په لمن کې ماتیدم
د خدای په رنګینو کې هغه ولمبیده
ډیوې چې مو د سترګو بلولې هغه وخت
په زړو کې مودلچسپه منظره ولمبیده
جلان وم د لذت په ارزښتونو باندې بر
په غیږ کې مې دمینې زمانه ولمبیده
سیدجیلاني جلان