تاند- د افغانستان د انتخاباتو خپلواک کمیسیون وايي چې تر پرونه د ۷ زره ۳۸۲ صندوقونو رایې شمېرل شوي وې او نن یې د ابطال پړاو پیل شو.
د رایو تفتیش د ۲۶۰ ټیمونو له لوري په ۲ شیفتونو کې روان دی.
له دې سره په یووخت د افغانستان د انتخاباتو خپلواک کمیسیون د کورنیو او نړیوالو څارونکو تر څارنې لاندې د رایو د پایلو د جمع بندۍ بهیر نن /پنجشنبه/ پیل کړ. په دې بهیر کې ښودل کېږي چې کومې رایې باطلې شوي او کومې منل شوي دي.د انتخاباتو د خپلواک کمیسیون ویندوی نور محمد نور وویل، د دې بهیر په پای کې به د انتخاباتو قطعي نتیجه څرګنده شي.
د ښاغلي نور په وینا د رایو د باطلېدو په اړه ځینې پرېکړې به د ټولو په وړاندې وشي.
د ده په وینا د رایو د تفتیش او بیا شمېرلو په مهال له کړنلارې سره سم یو شمېر مشکوکې رایې په نښه کېدې او اوس د باطلېدو په مرحله کې د هغو د ابطال په اړه پرېکړه کېږي.
له دې پړاو سره په یووخت به د پاتې رایو د تفتیش او بیا شمېرلو کار دوام وکړي څو د ولسمشرۍ د انتخاباتو پایلې په ټاکلي وخت څرګندې شي.
د افغانستان ولسمشر حامد کرزي نن یو وار بیا غوښتنه وکړه چې د رایو پایلې دې له ټاکلي مهالوېش سره سمې څرګندې شي.
نور د شپږ زره صندوقونو د بیا تفتیش او شمېرلو احتمال مطرح کړ، ویې ویل چې هر کاندید د ۳ زرو صندوقونو په اړه شک څرګند کړی او وړاندیز یې کړی چې هغه دې بیا وکتل شي.
دا صندوقونه تراوسه پوري تفتیش شوي نه دي.