تر ډېرو كلونو وروسته د علومو اكاډمي په تشكيل كې پنځلس بستونه د علومو اكاډمي په وړانديز اود چارو د ادارې په موافقې سره زيات شول او وروسته له څو كلونو څخه د افغانستان د علومو اكاډمي ته د شموليت كادري آزموينه نن چهارشنبه د سنبلې د مياشتې په ۱۲ نېټه د علومو اكاډمي د كانفرانسونو په تالار كې د علومو اكاډمي د اړوندو څانګو د باصلاحيته هيئت په حضور كې واخيستل شوه .
په دغه آزموينه كې د بېلابېلو څانګو لكه حقوقو او سياسي علومو ، اقتصاد ، تاريخ او اتنوګرافي ، اسلامي علومو ، ژورناليزم ، زراعت ، طب ، پښتو ادبيات ، ځمكپوهنه ، او اوزبكى ژبې ۳۴ تنو نارينه او ښځينه كانديدانو برخه اخيستې وه .
د ازموينې پروسه ډېره شفافه او د ګډونوالو د قناعت وړ وه ، بايد يادونه وكړو ، هغه كانديدان چې په دې آزموينه كې بريالي شي ، وروسته د يونسكو په يوه نړيواله ژبه كې هم ترې آزموينه اخيستل كيږي او په دواړو ازموينو كې تر بريالتوب وروسته د علومو اكاډمي په علمي كادر كې شامليږي .