تاند- د امریکا ولسمشر بارک اوباما په افغانستان کې د امریکايي پوځیانو پخوانی عمومي قومندان جنرال جان الن په سوریه او عراق کې د اسلامي دولت د وسله والې ډلې پرضد د جګړې د نړیوالو هلوځلو همږغوونکی وټاکه.
جان الن په سیمه کې او د سیمې له مشرانو سره د کار اوږده تجربه لري.
امریکايي چارواکو د جمعې په ورځ د دې اعلان ترڅنګ وویل چې جان الن به په سیمه کې د اسلامي دولت د وسله والې ډلې پرضد د نړیوال ايتلاف لپاره د ولسمشر بارک اوباما ځانګړی استازی هم ونومول شي.
الن د ۲۰۰۶ او ۲۰۰۸کلونو ترمنځ په بغداد کې د امریکا د سمندري ځواکونو د فرقې قومندان و. ده په انبار ولایت کې خدمت کړی او د القاعده پرضد یې د سني قبایلو د بېدارۍ د غورځنګ په فعالولو کې مهمه ونډه لرلې چې په نتیجه کې یې القاعده په عراق کې ماتې وخوړه.
الن له عراقه وروسته د امریکا د قواوو مرکزي قومندان شو او وروسته د ۲۰۱۱ میلادي کال له جولای څخه د ۲۰۱۳ کال تر فبرورۍ پوري په افغانستان کې د نړیوالو ځواکونو قومندان پاتې شو.
د ډېرو په نظر الن په افغانستان کې ډېر بریالی و. ده د نړیوالو ځواکونو له لوري د ملکي تلفاتو شمېر زیات راکم کړ او که به په کوم ځای کې ملکیانو ته تلفات واوښتل فوراً به یې بخښنه وغوښته او د پېښې په اړه به یې تحقیقات پیل کړل. له همدې کبله یې له ولسمشر حامد کرزي سره ښې اړیکې لرلې.