تاند- د ناټو یوه جګپوړي دیپلومات نن /سې شنبه/ وویل، د افغانستان نوی ولسمشر اشرف غني احمدزی به راتلونکې اوونۍ د واک له ترلاسه کولو څلرویشت ساعته وروسته امنیتي موافقه لاسلیک کړي.
ناټو غواړي چې د روان کال په پای کې خپل ټول جنګي ځواکونه وباسي خو لږ شمېر پوځیان د افغان امنیتي ځواکونو د روزنې لپاره پرېږدي. د دغو ځواکونو د پرېښودو لپاره د افغانستان او امریکا او د افغانستان او ناټو ترمنځ قانوني سند پکار دی.
د رویټرز خبري اژانس د راپور له مخې د ناټو یوه جګپوړي دیپلومات وویل، اشرف غني احمدزی به د راتلونکې دوشنبې په ورځ لوړه په ځای کړي او ګومان کېږي چې د لوړې له مراسمو ۲۴ ساعته وروسته به دوه اړخیزه امنیتي موافقه لاسلیک کړي او دغه راز تمه ده چې له ناټو سره هم دوه اړخیزه موافقه لاسلیک کړي.
رویټرز وايي، د ناټو دغه چارواکي نه غوښتل نوم یې واخیستل شي ځکه چې په دې اړه یې د خبرو کولو اجازه نه لرله خو ویې ویل:«راتلونکې اوونۍ به موږ په داسي یوه موقعیت کې یوو چې هر څه به د موافقې د لاسلیک لپاره برابر شوي وي.»
حاضردمه د ناټو ترمشرۍ لاندې نړیوال ځواکونه په افغانستان کې۴۱ زره سرتېري لري چې په څلورو کې درې برخې یې امریکایان دي.
له راتلونکي کاله به د دغو پوځیانو پر ځای شاوخوا ۱۲ زره روزونکي په افغانستان کې مېشت شي چې د هغو نژدې ۸ زره به امریکایان وي. همداراز به شاوخوا ۱۸ سوه امریکايي پوځیان تروریستي ضد عملیات کوي.
د ناټو دیپلوماتان وايي چې که د افغانستان د ولسمشرۍ لانجه اکتوبر ته غځېدلې وای ناټو ښايي له دې پرته چې ټول ځواکونه وباسي بله چاره نه وای لرلې.