تاند- په بلخ ولایت کې پر یوه واده د لاسي بم په حمله کې لږتږه ۴ تنه ملکیان وژل شوي او ۲۰ نور ژوبل شوي دي.
د بلخ د امنیې قومندانۍ چارواکو رسنیو ته وویل چې دا برید طالبانو په چمتال ولسوالۍ کې په داسي حال کې وکړ چې خلک د واده خوشالۍ ته راټول شوي ول.
طالبانو د دې برید په اړه تراوسه پوري څه نه دي ویلي. د بلخ په چمتال ولسوالۍ کې، چې ډېری اوسېدونکي یې په خټه پښتانه دي، په وروستیو کې د طالبانو له لوري له رامنځته شوې ناامنۍ د خلکو شکایتونه زیات شوي وو.
له بلې خوا په کندهار کې بهرنیو پوځیانو پرون مازدیګر دوه تنه موټرسایکل سپاره هغه مهال وویشتل چې د دوی په لور ورروان ول او د درېدو د امر پروا یې ونه کړه.
دا پېښه په دامان ولسوالۍ کې وشوه.
د کندهار چارواکي وايي چې د دې پېښې په اړه تحقیقات پیل شوي دي. په کندهار کې مېشتو بهرنیو پوځیانو تراوسه پوري په دې اړه څه نه دي ویلي.