تاند- د افغانستان د کورنیو چارو وزارت وايي چې د کرنې او مالدارۍ پر کاندید وزیر د ایستونیا تور بې دلیله او ناسم دی.
د کورنیو چارو وزارت نن /یکشنبه/ په یوه خبرپاڼه کې ویلي چې پر یعقوب حیدري د لګول شویو تورونو په اړه د افغانستان نړیوالو پولیسو یا انټرپول څېړنې وکړې او ورته څرګنده شوه چې د ده له لوري ایستونیا ته د مالیې د نه ورکولو تور بې ناحقه دی.
په همدې حال کې د افغانستان سترې محکمې په یوه حکم کې له ایستونیا غوښتي چې دغه هیواد ته د ښاغلي حیدري پر سفر بندیز پای ته ورسوي څو د خپل حق دفاع وکړي.
د افغانستان د انترپول د دفتر ريیس سید افندي وویل:«محمد یعقوب حیدري له ایستونیا تښتېدلی نه دی بلکې غواړي چې دغه هیواد ته لاړ شي او خپله حقوقي دعوه حل کړي.»
ښاغلي حیدري مخکې ویلي و چې ایستونیا په ده باندې د تور پوري کولو له لارې هڅه کوي چې شتمنۍ یې غضب کړي.
د انترپول د افغانستان د دفتر رييس هم دې مسلې ته په اشارې وویل چې ښاغلي حیدري په ایستونیا کې د ملیونونو ډالرو پانګونه کړې او هغه مالیه چې ادعا کېږي ده نه ده ورکړې خورا لږ پیسې دي.
د کورنیو چارو وزارت هم وايي، هڅه کوي چې ایستونیا ته د ښاغلي حیدري د تګ لاره اواره کړي.
حیدري ویلي چې د افغانستان له تېر حکومته یې هم غوښتي و چې د ایستونیا په وړاندې د ده د روا حق دفاع وکړي خو تېر حکومت د ده غوښتنې ته پام ونه کړ.
وروسته له دې چې د نوې کابینې په لیست کې د کرنې او مالدارۍ د وزارت د کاندید په توګه د محمد یعقوب حیدري نوم ولیدل شو، د انټرپول په تور لیست کې د نوموړي نوم ته توجه واوښته. د انټرپول په لیست کې حیدري یو له هغو کسانو څخه ګڼل شوی چې باید تعقیب او ایستونیا ته وسپارل شي ځکه چې اووه کاله پخوا یې مالیه نه ده ورکړې.