تاند- ویل کېږي چې د افغانستان ولسمشر محمد اشرف غني به تهران ته په کېدونکي سفر کې له ایران سره د دوه اړخیزو ستراتیژیکو همکاریو تړون لاسلیک کړي.
ناتایید شوي راپورونه وايي چې د دواړو هیوادونو ترمنځ پر موضوع خبرې روانې دي.
افغانستان تر دې پخوا له امریکا، ایټالیا، بریتانیا، فرانسې، چین او هند سره د ستراتیژیکو همکاریو موافقې لاسلیک کړي دي.
افغانستان او ایران په مجموع کې جدي اختلاف نه لري او نه د یو بل د خاورې پر کومه برخه ادعا لري.
خو له دې سره سره د ولسي جرګې ځیني غړي او د سیاسي چارو یو شمېر نظرخاوندان فکر کوي چې ایران هغه شرایط لا پوره کړي نه دي چې افغانستان دې ورسره د ژورو ستراتیژیکو همکاریو تړون لاسلیک کړي. دوی له افغان کډوالو سره زورزیاتی، د نیمروز ولایت په مربوطاتو کې د افغانستان په خاورې کې د ایرانیو پوستو د جوړېدو، د افغانستان په خاوره کې د دېوال جوړول او په فراه، هرات، او نیمروز ولایتونو کې د بخش اباد، سلما او کمال خان بندونو سره د ایران مخالفت هغه دلایل ګڼي چې د دوی په وینا پکار نه ده له ایران سره د ستراتیژیکو همکاریو تړون لاسلیک شي.
ویل کېږي چې ایران ته د افغانستان د ملي امنیت د سلاکار محمد حنیف اتمر په وروستي سفر کې په دې د افغانستان او ایران د ستراتیژیکو همکاریو د موافقې په باب خبرې شوې وې.
ویل کېږي چې امریکا د افغانستان او ایران ترمنځ د ستراتیژیکو همکاریو مخالفه نه ده بلکې د دې غوښتونکې ده چې افغانستان له خپلو ټولو ګاونډیانو سره نژدې اړیکې ولري خو دا احتمال شته چې سعودي عربستان اندېښمن شي.
ولسمشر غني د یکشنبې په ورځ په ګاونډیو هیوادونو کې د افغانستان له سفیرانو سره په ویدیو کنفرانس کې وویل چې ژر به ایران او هندوستان ته سفر وکړي.
په همدې حال کې ټاکل شوې ده چې د ایران مرستیال ولسمشر محمد شریعتمداري سبا کابل ته راشي. ایران وايي چې ښاغلی شریعتمداري به له افغان مشرانو سره پر سوداګري اړیکو خبرې وکړي.