جنګ
جنګ جدایې ده، جنګ جهنم دی
جنګ جنایت دی، مرګ د صنم دی
جنګ بې جبرانه جور و جفا ده
جنګ بې انجامه د جانان غم دی
جنګ جمالسوز دی، جنګ جلال کش دی
جنګ له هجرانه جوخت و پیهم دی
جنګ په مجبورو د کار جواز دی
جنګ د جابرو د کار سیسټم دی
جنګ جهاد نه دی، جنګ سپی جدل دی
جنګ سګجنګې ده، شر کلهم دی
جنګ نه جرات دی، نه جانبازې ده
جنګ یو مجبوره بني آدم دی
جنګ په وجود کې خوني خنجر دی
جنګ داسې جرحه، ورک یې ملهم دی
جنګ جهانسوز دی، جام جد وجهد
د جنګ رواج کې، جهان برهم دی
جنګ انجماد دی، حجره- حجره کې
جنګ را فلج کړی، نفس او دم دی
جنګ بې وجدانه، تاجر انسان دی
جنګ په جومات کې قرآن کې بم دی
جنګ جوارګر دی، جنګ هیجان دی
له جنګه جار ټول، فضل و کرم دی
جنګ تجاوز دی پر محجوب حسن
جنګ جامه کش له هر محترم دی
جنګ جمله ژوند ته جمله جنجال دی
جنګ نه عرب دی جنګ نه عجم دی
جنګ بې حجابه یو سره رنډۍ ده
خجل هغه چې پرې متهم دی
جنګ بې ادبه جاهل جلاد دی
چې یې په مخ کې جګ سر قلم دی
جنګ خر دجال ته نجس سجود دی
جنګ په جنت کې حرام قدم دی
جنګ بې جهته جوړ انفجار دی
جنګ وران جریان دی، پر ژوند ور سم دی
جنګ عجله ده، جنګ فاجعه ده
جنګ بې جلبه حیواني چم دی
جنګ نه لیلا ده، جنګ نه مجنون دی
جنګ چټل کړی د عشق حرم دی
جنګ جېلخانه ده، جبرو زنجیر دی
جنګ مجهز په جدي ماتم دی
جنګ تجسم دی، د ګاټه جهل
جنګ په دماغ کې، ګاټه تورتم دی
جنګ دلجويې د، هر اجنبي ده
حکم د جنګ ته، مرتجع خم دی
د جنګ مجرم چې، څومره جبار وي
هومره شجاع دی، هومره اعظم دی
جنګ جلب وجذب د، جنایتکارو
جنګ حاکمیت د، رجیم ارجم دی
جنګ تجسس د، منحوس ابلیس دی
جهانجاروتی، درد و الم دی
جنګ ارتجاع ده، خوړینه اجماع ده
جنګ تجدد ته، د زهرو کوړم دی
جنګ کې راجمع، فاسق فاجر دی
پروت پر جوله یې، د دېب ظلم دی
جنګ جګړمار ته، د کار ایجاد دی
جنګ جنګیالي ته، جالب موسم دی
جنګ د جذباتو اوج مد و جذر
نتیجه! جوړ کار، برهم درهم دی
جنګ ته اجلاس د، ياجوج- ماجوج دی
په جنګ مجبور یې، انسان توکم دی
جنګ جارو کړی، له کل جهانه
جار و قربان او خیر مقدم دی
جنګ تښتولې، هره جلوه ده
جنګ دفن کړی، هر صبحدم دی
جنګ مواجه دی، د جام منار ته
جوړه تر څنګ یې، هم جام د جم دی
د جنګ په چنګ کې، کاکلان جړ دي
جنګ را ټیټ کړی، د رنګ پرچم دی
جنګ له جوزجانه، د ویر ټغر دی
تر جلالکوټه، خپور پر تورخم دی
جنګ تعجب دی، انسانیت ته
جنګ جړقولی، بابا آدم دی
جنګ تجمع ده، د فجایعو
رنج انزجار هم، ورسره ضم دی
جنګ مجموعه ده، د جراثیمو
جنګ په مجموع کې، زجر محکم دی
جنګ په مجلس کې، په انجمن کې
جسور جوان دی، تف یې بلغم دی
جنګ په سماج کې، ترویج تاراج دی
په استنتاج یې، منجر عدم دی
جنګ له معراجه، رجوع پنجرې ته
جولان جمود کې، ضم و مدغم دی
جنګ ناجایزه، زوج ازدواج دی
جنګ جستجو کې، د نامحرم دی
جنګ په مسجد کې، ساجد جبین دی
جعلي رجحان دی، په خدای قسم دی
جنګ په هجره کې، جعل و جرګه ده
حجاب د فسق و، چرس و چلم دی
د عاج په برج کې، د جنګ تجلیل دی
مجلل تاج ته، څوک مصمم دی؟
جنګ وریجې غوښې، د آدمخورو
په اجتناب ترې، نجیب اکرم دی
جنګ کج و وج دی، ګمراه مجال دی
جنګ بې سنجشه، یون پېچ و خم دی
جنګ نکته سنج ته، جرار، جامع ته
هجوم پر عقل، راج پر عالم دی
جنګ د لاجوردو، د جواهرو
رایج لوټمار دی، چور دی او چم دی
جنګ مجله ده، د جنایاتو
د مخ پر جلد یې، د مرګ البم دی
جنګ په جذابه لهجه اعجاز دی
د جنګ مجذوبه، هر لایعلم دی
د جنګ توجیه ته، د جنګ ترجیح ته
حق په جانب دی، څوک چې بېغم دی
د جنګ چنجی چې، مجاهد وخوري
نو جنګسالار شي، څه که رستم دی
اجاره کړې، جنګ تجزیه ده
وطن تباه پرې، سخت مستحکم دی
جنګ تجمل دی، جانی جناح ته
پرته له جنګه، نامنظم دی
جنګ ترجمه ده، د مجهول متن
ګونګ یې تفسیر ته، خپل مترجم دی
د جنګ مکتب کې، مروج دا چې
په جز و کل رد، کتاب قلم دی
د جنګ جهیش کې، معجزه دا چې
یو تن قاتل د، سلم- زرم دی
جنګ سجاده د شداد، فرعون ده
سجاد پر ناست د خدای په رقم دی
جنګ اجازه د هر جسارت ده
پر لمن داغ د خیرالامم دی
د جنګ جرس کې، وجد و جادو دی
په جم و جوش یې، جګ لوی وکم دی
د جنګ مجمر کې چې جل وبل دی
انسان بل بل تل، پرځای د شم دی
د زهرو جام دی، د جنګ انجام دی
د جنګ پیغام دی، نېښ د لړم دی
جنګ احتجاج دی، خدای ته چلنج دی
جنګ داسې جرم ته، قدعلم دی
جنګ لجاجت دی، جنګ څه حاجت دی؟
جنګ جواب کړی، د انسان زغم دی
جنګ ډېر جذاب دی، وحشي جنګي ته
چې جنګ یې دم دی، جنګ یې قدم دی
جنګ نجات نه دی، نه جنګ جوهر دی
د جنګ جبهه کې، سړیتوب کم دی
جنګ جامعه د جمالپریو
پر ویجاړیو سپاري ستم دی
جنګ را جګېږي له جهالته
جنګ کې هر جرم، روا او سم دی
جنګ جبه زار کې، جنون آمېزه
جوش و جنبش دی، موج مبهم دی
جنګ تجارت دی، د جنابانو
تجویز د جنګ یې، جوړ چم په چم دی
جنګ په جاپان کې، جنګ په جرمن کې
جنګ خجالت دی، خو دلته برم دی
جنګ هرج ومرج ته، د جن پرینجی دی
انسانستان کې، وحشت کوترم دی
جنګ تحجر دی، په جمجمه کې
جنګ له عروجه، فکر را تم دی
جنګ د اجدادو، د ژوند جدول وو
زموږ اجتهاد نن جدا رقم دی
عجب! انسان که، انسان خبر کا:
«ستا له جونګړې جنګ تری تم دی»
بدلون اوونيزه\ لومړی کال\(۱۶) ګڼه\ چارشنبه\جدي ۱۷\ ۱۳۹۳
افرین دی وی
سلامونه محمد یاره، ياره! د دي شعر پر هره کلمه دی خوله د ياقوتو او زمرودو د ډکولو لياقت لري خو چيري دی د وخت سلطان محمود غزنوي. افرین په تا سه.
په درنښت
دیرعلی شعر ده دا تول حقیقت لری خو لا لنډ ده
جنګ کې طلب د لوی القا ب دی
یو کې خا دم بل جلا لتما ب دی
یو کې ا میر بل کې نا یب دی
نتیجه
ا میر خادم ، خادم کا میا ب دی
بیشکه چی محمد یار په ارزی او د زړه له درده یی ښکاری چی ددی ملت رشتونی بچی دی .