تاند- د افغان چارواکو په وینا نامعلومو وسله والو کسانو د هرات- فراه په لاره کې شپږ تنه تښتولي دي.
د چارواکو په وینا تښتونکو مولونه (ماسکونه) وهلي ول.
تراوسه پوري کومې ډلې د دې پېښې مسوولیت په غاړه نه دی اخیستی.
ویل شوي چې په برمته شویو کسانو کې څلور تنه د ملي اردو سرتېري دي.
دا په وروستیو څه باندې درو اوونیو کې د تښتونې درېمه پېښه ده.
لومړۍ پېښه (د فبروري ۲۳مه) د زابل په شاجوۍ ولسوالۍ کې وشوه. درې اوونۍ مخکې ۳۱ په خټه هزاره مسافر د نامعلومو وسله والو له لوري له دوو بسونو څخه کښته کړای شول.
د روانې اوونۍ د یکشنبې په ورځ په غزني کې لس تنه مسافر له موټرو کښته او د برمته ګرو له لوري نامعلوم لور ته په مخه کړای شول.
مسافر له جاغوري ولسوالۍ څخه د غزني مرکز ته روان ول.