تاند- د ګلبدین حکمتیار په مشرۍ د افغانستان اسلامي حزب د افغانستان د حکومت او طالبانو ترمنځ د سولې د خبرو ملاتړ وکړ.
د حکمتیار سیاسي سلاکار غیرت بهیر وویل چې ګوند او مشر یې د طالبانو او حکومت د سولې د خبرو ملاتړ کوي.
ښاغلي بهیر د ترکیې اناتولیا خبري اژانس ته وویل، د قطر په پلازمېنه دوحه کې د طالبانو او حکومت ترمنځ وروستۍ خبرې یو هڅونکی پرمختګ و.
د مې په دوهمه نېټه د طالبانو، حزب اسلامي، پاکستان او د افغانستان د حکومت استازو په یوه دوه ورځني کنفرانس کې، چې په قطر کې د پګواش موسسې له لوري ترتیب شوی و، ګډون وکړ او د سولې په اړه یې خپل نظرونه څرګند کړل.
بهیر، چې په خپله یې د قطر په غونډه کې د حزب اسلامي د درې کسیز پلاوی مشري کوله، وویل چې دا خبرې ډېرې رغنده او مهمې وي.
ده له اناتولیا خبري اژانس سره په مرکه کې همداراز وویل:«طالبانو د خپل دریځ نرمولو ته لېوالتیا ښکاره کړه او دا به سولې ته لار پرانیزي. د طالبانو پلاوي، چې له اتو تنو جوړ و، دیپلوماتیک تمایل وښود.»
د غیرت بهیر په وینا د قطر خبرې د ټولو خواوو ترمنځ د دایمي سولې لور ته ښه پیل و.
ټاکل شوې ده چې ښکېلې خواوې بل پړاو خبرې په متحده عربي اماراتو کې وکړي.
تمه کېږي چې دواړه خواوې به په دې ډول غیررسمي خبرو کې رسمي دیالوک ته لاره هواره کړي.