خبریال: عادل- د ښار صنفي وکيلان نن هلمند مدني ټولنې ته په شکایت ورغلي وو چې ښاروالۍ ترې د صفايي ټکس پنځلس برابره لوړ اخلي.
د هلمند مدني ټولنې مسؤلان وايي، له ځايي او مرکزي ادارې سره به د وکيلانو ستونزه شريکه کړي څو يې د هوارۍ لپاره ژر هڅې وشي.
بل پلو د لښکرګاه ښاروالۍ مرستيال د خلکو شکایت ردوي او وايي د مرکزي ادارې له پرېکړې سره سم يې ګام اخيستی.
د هلمند د مرکز لښکرګاه ښار بېلابېلو صنفي او ګذر وکيلانو، چې نن د هلمند مدني ټولنې په انګړ کې راټول شوي وو، په ښاروالۍ تور پورې کړ چې د کلنۍ صفايي ټکس ترې نږدې پنځلس برابر لوړ اخلي.
دغه راز دوی د مستوفيت، نظاراتو او املاکو سره هم ورته ستونزه لرله.
د سلمانانو وکيل وايي، د ښاروالۍ لخوا ترې هر کال د يوې هټۍ پر سر ۱۵۰۰ افغانۍ اخيستل کيږي، چې پخوا له دوی ۱۰۴ افغانۍ اخيستل کېدلې.
دغه راز د چينه پلورنکو وکيل وايي، پخوا دوی د هر دوکان پر سر ۲۵۱ افغانۍ تحويلولې خو اوس ترې ۳۰۰۰ افغانۍ اخيستل کيږي.
د بزازانو، مستريانو او نورو بېلابېلو وکيلانو هم د پنځلس برابره لوړې کرايې شکايت کاوه.
بېلابېلو وکيلانو وويل: ((موږ باندې ښاروالۍ د صفايي کرايه لوړه کړې، مستوفيت راباندې ماليه لوړه کړې، چې څوک واسطه ولرې کمې پيسې ترې اخلي چې واسطه ونه لري نو څو چنده لوړه کرايه ترې اخلي، خلک بېکاره سوي، کاروبار نسته، پرون شلو مستريانو خپل دوکانونه په دې خاطر وتړل چې د کرايې روپۍ ورسره نه وې.))
دغه راز دوی په ښاروالۍ دا تور هم پورې کړ چې د مرکز لخوا په راستول شوې جريده کې یې، چې د هټيو اړوند مالومات او د جواز د پيسو کچه پکې ليکل شوې، لاس وهلی دی.
خلکو له هلمند مدني ټولنې او دولته په ټينګه غوښتنه وکړه چې د دوی اواز دې پورته کړي او د ستونزې په هوارۍ کې دې ورسره مرسته وکړي.
پر همدې مهال د هلمند مدني ټولنې مشر سردار محمد همدرد وويل، د ولايتي او مرکزي ادارې سره په همغږۍ به د وکيلانو ستونزه سپړي او د هوارۍ په موخه به يې تر مرکزه منډې ترړي وکړي.
نوموړي خلکو ته ډاډ ورکړ چې له ښاروالۍ او نورو اړونده ادارو به وغواړي څو چې د وکيلانو ستونزه په مرکزي کچه نه وي هواره شوې له دوی به لوړه کرايه نه اخلي.
سردار محمد همدرد وويل: (( بېکاري ډېره سوې ده، کاروبار نسته، په داسې وخت کې چې پر هټيوالو کرايه هم لوړه سي نو هټيوال مجبور دي چې خپلې هټۍ وتړي، اقتصادي بحران به رامنځته سي، له ښاروالۍ او مرکزي حکومت مو غوښتنه دا ده چې په دې موضوع غور وکړي.))
که څه هم خلک په ښاروالۍ د لوړو کرايو د اخيستو تور پورې کوي خو د هلمند ښاروالۍ مرستيال احمد مسعود سېلاب وويل، پخوا به له هټيو د کرايو او جوازونو د پيسو اخيستو لايحه ولايت کې جوړېده خو اوس مرکز کابل کې جوړيږي.
نوموړي زیاته کړه، د ټول هېواد په کچه په درې کټګوريو کې لايحي جوړيږي چې په لومړۍ برخه کې مرکز په دويمه ګټګورۍ کې ولايتونه او درېيمه کې ولسوالۍ شاملې دي.
مسعود سېلاب وويل: ((موږ د مرکز د پرېکړې سره سم ګام اخيستی دی، په دې لايحه کې لاسوهنه نه کيږي، له مرکزه موږ ته جريده را استول شوې چې د هغې مطابق موږ اجرات کوو، که څوک شک لري او يا ستونزه لري نو کولی شي مرکز ته ولاړ شي او هلته پوښتنه وکړي او دا چې خلک يې نه مني نو مالومه خبره ده چې خلک قانونه ته غاړه نه ږدي.))
په دې وروستيو کې هلمند کې د نورو ستونزو سره سره املاکي ستونزې، د ځمکو غصب، د هټيو لوړه کرايه او نورې ورته ستونزې ډېرې شوي دي، خلک په ځايي دولتي ادارې او ښاروالۍ تورونه پورې کوي خو دولتي مسؤلين بيا د خلکو ستونزې ردوي او وايي چې د قانون سره سم قدم اخلي.