تاند- وسله والو سخت دریځو تېره شپه د کندوز ولایت په الچین سیمه کې د نجونو یوه ښوونځي ته اور ورته کړی دی.
الچین د کندوز ښار په شمالي څنډه کې دی. د کندوز ښار په دې پښتون مېشته سیمه کې د دولت وسله وال مخالفان نسبتاً زیات فعال دي. خو د تېرې شپې د حملې مسوولیت تراوسه پوري کومې ډلې په غاړه نه دی اخیستی.
د کندوز امنیه قومندان عبادالله تلوار رسنیو ته وویل: ناپېژندویو وسله والو ښوونځي ته له ننوتلو وروسته د هغه د ساتونکي لاسونه او پښې تړلي او بیا یې د ښوونځي ټولګیو او کتابونو ته اور ورته کړی دی.
د امنیه قومندان په وینا وسله والو سخت دریځو ښوونځي ته پر غځېدلي سړک ماینونه هم ایښي و چې پولیسو کشف او شنډ کړل.
ده وویل دا ډول کارونه د دولت وسله وال مخالفان په تېره بیا وسله وال طالبان کوي.
د طالبانو د واکمنۍ په موده کې د نجونو پر تعلیم بندیز و او اوس هم د افغانستان د جنوب په هغو سیمو کې چې طالبان واکمن دي د نجونو ښوونځي بند دي.