تاند- د افغانستان اجرايي رييس په هیواد کې د مېشتو بهرنیو پوځیانو له قومندان سره په کتنه کې وویل چې افغان امنیتي ځواکونه به له دې وروسته د خپلو وسله والو مخالفانو مشران او قومندانان په نښه کوي.
د اجرايي ریاست له یوې خبرپاڼې سره سم، عبدالله عبدالله نن له جنرال جان ایف کیمبل سره په کتنه کې وویل:«د مخالفانو د رهبرۍ په نښه کول د امنیتي وضعیت له ښه کېدو سره کومک کوي او دا چاره به په نور قوت دوام کوي.»
په خبرپاڼه کې دې ته اشاره نه ده شوې چې د دولت د وسله والو مخالفانو مشران به، چې ویل کېږي اکثره په پاکستان کې دي، په څه ډول په نښه کېږي.
ښاغلي عبدالله د خپلو خبرو په دوام کې وویل چې د افغان ملي امنیتي ځواکونو ترمنځ د استخباراتي معلوماتو د شریکولو پروسه هچټکه شوې او هڅې روانې دي چي دا سلسله نوره هم تېزه شي څو پر وخت او زمان د مخالفانو پلانونه شنډ شي.
اجرايي رئیس د بهرنیو سرتیرو له عمومي قومندان څخه وغوښتل چې د استخباراتي معلوماتو په شریکولو او د افغان هوايي ځواکونو د پیاوړتیا لپاره همکاري زیاته کړي.
د بهرنیو سرتیرو عمومي قومندان جنرال جان کیمبل وویل، دوی له افغان ځواکونو سره په ګډه د مشورې او روزنې په برخه کې ګڼ پروګرامونه پیل کړي دي.
هغه زیاته کړه، افغان ځواکونو د تیرو اوونیو په اوږدو کي د مخالفانو حملو ته ښه ځواب ویلی او هممهاله یې په څو ولایتونو کې د مخالفانو پر ضد تصفیوي او محاربوي عملیات رهبري کړي دي.
نوموړي وویل، دوی له افغان ځواکونو سره کار کوي چي د ملي اردو هوايي ځواک نور هم فعاله او پر مخالفانو د حملو کولو جوګه شي.
ښاغلي کیمبل وویل چې د افغانستان هوايي قواوو ته به نوي محاربوي څرخکې رانیسي او همداراز اوسنۍ جنګي او لوژیستیکي څرخکې ترمیم کړي.