تاند- بریتانیايي ساینسپوهانو په موږکانو له بریالیو تجربو وروسته د ملیونونو نابینایانو د رغېدو هیلې غوړولې دي.
ساینسپوهان توانېدلي چې د رڼا په وړاندې حساسې حجرې، چې د بینايي یا نظر لپاره مهمې دي، په سترګوکې داخلې کړي او په دې ډول د سترګو یوه مهمه برخه جوړه کړي.
دا حجرې یوه موږک ته پیوند شوې او داسي ښکاري چې وده یې عادي ده، د سترګو او مازغو (مغز) ترمنځ یې ارتباط ټینګ کړی دی.
ساینسپوهان هیله لري چې په راتلونکو پنځو کلونو کې به د لومړي ځل لپاره دا تجربه پر یوه نابینا انسان هم وکړي او په نهایت کې به د ملیونونو نابینایانو درملنې ته لاره اواره کړي.
د دې پروژې یوه څېړونکي رابین الي وویل: د یو څو ګوته په شمېر حجرو پیوند کېدای شي د انسانانو پر ژوند لوی اغېز ولري. د درملنې په دې طریقه هغه ښځې او نارینه چې په زړښت کې د سترګو له نظره بې برخې کېږي، په اسانه د بینا سترګو خاوندان کېدای شي.
په بریتانیا کې شپږ لکه تنه یا تقریباً یا کاملاً نابینا دي خو څرنګه چې په دغه هیواد کې د زړو شمېر مخ په زیاتېدو دی په راتلونکو درو کلونو کې به دا شپږ لکه درې برابره شي.